Ռուսական զորքը ՀՀ-ի ղեկավարման ներքո պիտի լիներ արդեն․ ՌԴ-ն չի ուզում Ադրբեջանի դեմ պատերազմել․ Անդրիաս Ղուկասյան․ ՏԵՍԱՆՅՈՒԹ

Factor TV-ի հարցազրույցը քաղաքագետ Անդրիաս Ղուկասյանի հետ:

-Ինչո՞ւ է Ադրբեջանը սանձազերծել այս ագրեսիան ՀՀ սուվերեն տարածքի նկատմամբ, ո՞րն է Ադրբեջանի կողմից նախաձեռնված այս սադրանքի նպատակը:

-Ակնհայտ է, որ դա փարիզյան հանդիպումների արձագանքն է: Այսինքն՝ այդ գործողությունները մեկնարկեցին այն բանից հետո, երբ Փարիզում ԵԱՀԿ Մինսկի խմբի համանախագահների հանդիպումը տեղի ունեցավ Հայաստանի և Ադրբեջանի արտգործնախարարների հետ, ինչպես նաև եղան այլ հանդիպումներ Ֆրանսիայի արտգործնախարարի հետ, նաև հանդիպումներ ունեցան ՌԴ պաշտպանության նախարարի հետ… Շոյգուն և Լավրովը Ֆրանսիայում էին գտնվում, և հասկանալի է, որ այս ամենը կապված է Մինսկի խմբի հովանու ներքո պատրաստվող ՄԱԿ-ի Անվտանգության խորհրդի այն բանաձևի նախագծի հետ, որը, ըստ էության, ԱՄՆ-ը, Ֆրանսիան և Ռուսաստանն արդեն համաձայնեցրել են միմյանց հետ և արդեն հասել է Հայաստանի և Ադրբեջանի հետ համաձայնեցման պահը:

3+2 ձևաչափը ենթադրում է, որ համանախագահներն ինչ-որ առաջարկի շուրջ կոնսենսուսի են գալիս, որից հետո առաջարկում են ՀՀ-ին և Ադրբեջանին՝ միանալ այդ առաջարկին։ Նախապատրաստվում է բանաձև, ըստ որի՝ Արցախում պետք է հաստատվի ՄԱԿ-ի մանդատի կառավարում, այսինքն՝ միջազգային վարչակազմ, Ադրբեջանը պետք է դուրս գա Շուշիից և Հադրութից, նախկին ԼՂԻՄ-ի սահմանների շուրջ պետք է ստեղծվի անվտանգության գոտի, պետք է տեղակայվեն միջազգային խաղաղարար ուժեր։ Ադրբեջանն այդ առաջարկին համաձայն չէ և արձագանքում է ռազմական գործողություններով… Դա նշանակում է պատերազմի վերսկսում։ Կարո՞ղ են Ադրբեջանին սանձել, իհարկե՝ կարող են: Հայաստանն ինքնուրույն կարող է, բայց հերթական անգամ անպատրաստ ենք, որովհետև պատրաստվում էինք խաղաղության և ոչ թե պատերազմի վերսկսման։ Ռուսական զորքը ՀՀ-ի ղեկավարման ներքո պիտի լիներ արդեն: ՌԴ-ն չի ուզում Ադրբեջանի դեմ պատերազմել:

Հարցազրույցն ամբողջությամբ՝ տեսանյութում:

Ռոբերտ Անանյան