«Հայաստան» խմբակցության պատգամավոր Արթուր Սարգսյանը կալանավորվել է

Սիսիան քաղաքի նախկին համայնքապետ, «Հայաստան» դաշինքի պատգամավոր Արթուր Սարգսյանը կրկին կկալանավորվի։ Վերաքննիչ քրեական դատարանը՝ դատավոր Արմեն Դանիելյանի նախագահությամբ, որոշում է կայացրել բավարարել Գլխավոր դատախազության բողոքը և խափանման միջոց կիրառել կալանքը։

Պաշտպան Էմին Խաչատրյանը, սակայն, որոշումը «ապօրինի, խայտառակ գործելակերպ» է որակում։ Նրա խոսքով՝ անօրիանկանություն է տեղի ունեցել, ի սկզբանե դատավոր Տիգրան Սիմոնյանին մակագրված գործն անհայտ հանգամանքներում վերամակագրվել է Արմեն Դանիելյանին.

«Մենք սպասում էինք դատավոր Սիմոնյանի նիստի նշանակմանը, բայց ակնհայտ քաղաքական հանգամանքներում գաղտնի նիստ նշանակվեց ու կրկին կալանքի որոշում կայացվեց։ Ինձ չի ծանուցվել դատական նիստի մասին, մյուս պաշտպանին՝ Սմբատ Մինասյանին, մեկ ժամ առաջ՝ ոչ պատշաճ ծանուցում է եղել, ինչն անհնարին է դարձրել նրա մասնակցությունը նիստին»,- Factor.am-ի հետ զրույցում նշեց Խաչատրյանը։

Պաշտպանական կողմը որոշումը պատրաստվում է բողոքարկել Վճռաբեկ դատարան, իսկ մինչ այդ անձեռնմխելիության հարցով գործն արդեն առաջին ատյանի դատարանում է, այն կքննի Աննա Դանիբեկյանը.

«Մեր դիմումի հիման վրա Մարդու իրավունքների պաշտպանը դիմել է Սահմանադրական դատարան՝ Արթսւր Սարգսյանի անձեռնմխելիության հիմքով։ Սակայն այդ դիմումով դեռևս որևէ տեղաշարժ չկա»։

Այս պահին Արթուր Սարգսյանը պատրաստվում է ինքնակամ ներկայանալ «Վարդաշեն» քրեակատարողական հիմնարկ, որտեղ գտնվել էր մինչ ազատ արձակվելը։

Հիշեցնենք՝ նախկին քաղաքապետն ազատ էր արձակվել հոկտեմբերի 14-ին՝ 20 միլիոն ՀՀ դրամ գրավի դիմաց։

Արթուր Սարգսյանը կասկածվում է ՀՀ Քրեական օրենսգրքի 308-րդ հոդվածի երկրորդ մասով (պաշտոնեական լիազորությունները չարաշահելը) և ՀՀ ՔՕ 314-րդ հոդվածի առաջին մասով (պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը, կեղծում, քերվածք կամ այլ թվական գրառումներ կամ փոփոխություններ կատարելը, ինչպես նաև կեղծ փաստաթղթեր կազմելը կամ հանձնելը):

Ռոզա Վարդանյան