Էրդողանի կուսակցությունը Թուրքիայում սիրիացի փախստականներին օգտագործում է՝ տնտեսական խնդիրներից հանրությանը շեղելու համար

Թուրքիայի նախագահ Ռեջեփ Թայիփ Էրդողանի կառավարությունն օգտագործում է երկրում սիրիացի փախստականներին՝ հիվանդ տնտեսությունից հանրության ուշադրությունը շեղելու համար։ Այս մասին գրում է «Ահվալ» գործակալությունը՝ վկայակոչելով Ahram Online-ը։

Իշխող «Արդարություն ու զարգացում» կուսակցությունը ձախողել է սիրիացի փախստականների մասին առասպելների փարատումը, այդ թվում՝ թուրքական համալսարաններում անվճար ուսման, ամսական հնգանիշ աշխատավարձի և անվճար բժշկական օգնության իրավունքը: Լրատվամիջոցը գրում է, որ այս մասին են խոսում նաև սիրիացիների վերջին ձերբակալութունները «բանան ուտելու տեսանյութերի պատճառով»։

Թուրքիայում մոտ 3․7 մլն սիրիացի փախստականներ բախվում են այլատյացության ալիքի, որն ավելի է ուժգնանում երկրում գործազրկության բարձր մակարդակի ու տնտեսության անկման պատճառով։ Սիրիայում Թուրքիայի նոր ռազմական գործողությունները համընկնում են երկրում լուրջ ներքին խնդիրների հետ, նշվում է, որ ըստ ընդդիմադիրների՝ Էրդողանը 2023 թվականի ընտրություններից առաջ մանևրում է՝ հանրությանը ներքին խնդիրնեից շեղելու համար։

Լրատվամիջոցը գրում է, որ Էրդողանն արդեն իսկ փորձ ունի օգտագործելու ռազմական գործողությունը՝ ընդդիմությանը բաժանելու և իր շուրջը կուսակիցներին համախմբելու համար։ Ըստ հրապարակման՝ ներկայում Սիրիայի սահմանին թուրքական ռազմական կուտակումները ոչ այլ ինչ են, քան «մկանների ցուցադրություն»։

Միաժամանակ, Թուրքիայում սոցհարցումների վերջին տվյալներով, թուրք առաջնորդի և նրա կուսակցության վարկանիշը շարունակում է նվազել։

Էմմա Չոբանյան