22.08.2026 | 21:13
Դիլիջան-Վանաձոր ճանապարհին ավտոմեքենան դուրս է եկել երթևեկելի հատվածից և բախվել հողաթմբին
Թուրքիա-Հայաստան և Հայաստան-Ադրբեջան հարաբերությունների կարգավորման գործընթացները պետք է փոխլրացնեն միմյանց․ Թուրքիայի ԱԺ նախագահ
Քաղաքականություն
09.11.2021 | 22:04
Թուրքիան ողջունում է Ադրբեջանի և Հայաստանի ղեկավարների հայտարարությունները երկխոսության պատրաստակամության մասին։ Անկարան ողջունում է նաև հայ և ադրբեջանցի խորհրդարանականների շփումների մեկնարկը։ Այս մասին հայտարարել է Թուրքիայի Ազգային մեծ ժողովի նախագահ Մուսթաֆա Շենթոփը ԵԱՀԿ խորհրդարանական վեհաժողովի նախագահ Մարգարեթ Սեդերֆելտի հետ հանդիպմանը, գրում է «Անադոլու» գործակալությունը։
Շենթոփն ասել է, որ 2020թ․ Արցախյան 44-օրյա պատերազմը նոր էջ է բացել Հարավային Կովկասի պատմության մեջ։ Նա նշել է, որ խաղաղությունն ու կարգավորումը տարածաշրջանի բոլոր երկրների շահերից են բխում։
«Դա վերաբերում է նաև Թուրքիայի և Հայաստանի հարաբերություններին։ Նախագահ Ռեջեփ Թայիփ Էրդողանն ավելի վաղ հայտարարել է, որ Հայաստանի կողմից անկեղծ քայլերի դեպքում՝ Անկարան պատրաստ է աստիճանաբար կարգավորել հարաբերությունները Երևանի հետ։ Թուրքիայի ու Հայաստանի միջև հարաբերությունների կարգավորման գործընթացը, ինչպես նաև Հայաստանի ու Ադրբեջանի հարաբերությունների կարգավորում պետք է փոխլրացնեն միմյանց»,-ասել է Շենթոփը։
Նա նաև կոչ է արել ԵԱՀԿ Մինսկի խմբի համանախագահներին ու ԵԱՀԿ նախագահի անձնական ներկայացուցչին՝ հաշվի առնել նոր իրողություններն ու վերլուծել միջնորդների բազմամյա ջանքերի անարդյունավետության պատճառները։
«Այս դեպքում ԵԱՀԿ-ն կարող է դրական ներդրում ունենալ Ադրբեջանի և Հայաստանի հարաբերությունների կարգավորման գործում»,- հայտարարել է Մուսթաֆա Շենթոփը։
Էմմա Չոբանյան
