03.04.2026 | 23:13
NASA-ն հրապարակել է Երկրի նոր լուսանկարը
Նոյեմբերի 9-ից 1 տարի անց․ Ռուսաստանի և ԱՄՆ-ի անդեմ ճառերը՝ Շուշիում ահաբեկչության ֆոնին․ ՏԵՍԱՆՅՈՒԹ
Քաղաքականություն
09.11.2021 | 20:50
Նոյեմբերի 9-ի եռակողմ հայտարարության տարելիցի նախորդ օրը Ադրբեջանն ահաբեկչություն է իրականացրել Շուշիի մոտ։ Արցախի դատախազությունը սպանության, նաև հենց ահաբեկչության հոդվածով է բացել քրեական գործը, որ վերաբերում է ջրագծի վրա աշխատող հայերի վրա կրակելու դեպքին։ Աշխատողներից մեկը մահացել է, մյուս երեքը հրաշքով են ողջ մնացել։
«Հատկանշական է, որ միջադեպը տեղի է ունեցել եռակողմ հայտարարության ստորագրման մեկամյակի նախօրեին և Ադրբեջանի նախագահ Իլհամ Ալիևի՝ Շուշի այցի օրը, որտեղ վերջինս իր ելույթում հանդես է եկել հերթական հայատյաց հռետորաբանությամբ լի հայտարարությամբ և ուժի կիրառման սպառնալիքներով»,- նշվում է ՀՀ ԱԳՆ հայտարարությունում։
Նախարարությունը հիշեցրել է՝ սա ադրբեջանական զինված ուժերի կողմից վերջին մեկ ամսվա ընթացքում խաղաղ բնակիչների վրա հարձակման երկրորդ դեպքն է։ Թեմային ԱԳ նախարար Արարատ Միրզոյանն անդրադարձել է նաև Ռուսաստանի գործընկերոջ հետ հեռախոսազրույցում։
Միջադեպից և Արարատ Միրզոյանի հետ զրույցից հետո Սերգեյ Լավրովը հեռախոսազրույց է ունեցել նաև Ադրբեջանի ԱԳ նախարար Ջեյհուն Բայրամովի հետ։ Ո՛չ ռուսական կողմը, ո՛չ ադրբեջանական կողմն ու ադրբեջանական մամուլը չեն հիշատակում այս միջադեպը։
Փոխարենը Ռուսաստանի ԱԳՆ-ն անդրադարձել է եռակողմ հայտարարության ստորագրման մեկ տարվան։ Նշվում է, թե հայտարարությունում արձանագրված պայմանավորվածությունները, ընդհանուր առմամբ, կյանքի են կոչվում։
Քաղաքագետ Բենիամին Պողոսյանը բացատրում է, որ Ռուսաստանն ունի առանձնահատուկ ազդեցություն և դրանից բխող՝ առանձնահատուկ նպատակադրում։
Հայտարարություն է արել նաև ամերիկյան կողմը։ Պետքարտուղարության խոսնակի հայտարարության մեջ անհասցե կոչ է արվում վերադարձնել բոլոր պահվող անձանց, լիարժեք հաշվետու լինել անհետ կորածների համար, ապահովել տեղահանվածների կամավոր վերադարձն իրենց տներ և այլն։
«Մենք Հայաստանին ու Ադրբեջանին հորդորում ենք Լեռնային Ղարաբաղի հակամարտությանն առնչվող կամ այդ հակամարտությունից բխող դեռևս չլուծված հարցերին համապարփակ լուծումներ գտնելու ուղղությամբ շարունակել ու առավել մեծացնել ջանքերի գործադրումը, այդ թվում՝ ԵԱՀԿ Մինսկի խմբի հովանու ներքո»,- նշվում է ԱՄՆ Պետքարտուղարության խոսնակի հայտարարության մեջ։
Ամերիկյան կողմի կոչերն էլ, ըստ Պողոսյանի, շատ հարաբերական են և գործողություններ չեն ենթադրում։
Մանրամասները՝ տեսանյութում։
Գարիկ Հարությունյան
