22.08.2026 | 21:13
Դիլիջան-Վանաձոր ճանապարհին ավտոմեքենան դուրս է եկել երթևեկելի հատվածից և բախվել հողաթմբին
Եվրահանձնաժողովի ղեկավարը կոչ է արել նոր պատժամիջոցներ կիրառել Բելառուսի դեմ
Քաղաքականություն
09.11.2021 | 15:54
Եվրահանձնաժողովի ղեկավար Ուրսուլա ֆոն դեր Լեյենը կոչ է արել ԵՄ երկրներին՝ հաստատել Բելառուսի դեմ պատժամիջոցների նոր փաթեթը՝ միգրացիոն ճգնաժամի պատճառով։ Համապատասխան հայտարարությունն այսօր հրապարակվել է ԵՀ պաշտոնական կայքում։
«Բելառուսը պետք է դադարի վտանգել մարդկանց կյանքը։ Բելառուսի կողմից քաղաքական նպատակով ներգաղթյալներին որպես գործիք օգտագործելն անթույլատրելի է։ Բելառուսի իշխանությունները պետք է հասկանան, որ ներգաղթյալներին նման ցինիկ կերպով օգտագործելը՝ ԵՄ-ի վրա ճնշում գործադրելու համար, չի օգնի հաջողության հասնել իրենց նպատակներում»,- ասված է հայտարարության մեջ։
Ֆոն դեր Լեյենը հավելել է, որ բանակցություններ է վարել Լեհաստանի և Լիտվայի վարչապետների հետ՝ քննարկելու այն միջոցները, որոնք ԵՄ-ն կարող է ձեռնարկել՝ աջակցելու նրանց այս ճգնաժամը հաղթահարելու ջանքերում:
«Կոչ եմ անում ԵՄ անդամ երկրներին՝ վերջնականապես հաստատել ընդլայնված պատժամիջոցների ցանկը Բելառուսի իշխանությունների դեմ, որոնք պատասխանատու է այս հիբրիդային հարձակման համար»,- ասել է ԵՀ նախագահը։
ԵՄ-ն կքննարկի նաև երրորդ երկրների ավիաընկերություններին «սև ցուցակում» ներառելու հարցը, որոնք ակտիվորեն ներգրավված են մարդկանց թրաֆիքինգի մեջ:
Տաթև Ֆռանգյան
