11.10.2026 | 10:11
Շանհայ. Կարեն Խաչանովը դուրս եկավ 1/8 եզրափակիչ
Բաքուն հայտարարել է, թե «օկուպացիայի վերացումից» հետո պատրաստ են հարաբերությունները կարգավորել Երևանի հետ
Քաղաքականություն
08.11.2021 | 13:29
Ադրբեջանի ԱԳՆ-ն հայտարարություն է տարածել, որում կրկին ադրբեջանական հայտնի թեզն է արծարծվում՝ «Լեռնային Ղարաբաղի հակամարտության լուծված լինելու մասին», գրում են ադրբեջանական լրատվամիջոցները։
Հայտարարության մեջ նաև նշվում է, թե Բաքուն պատրաստ է կարգավորել հարաբերությունները Հայաստանի հետ և «անհրաժեշտ է համարում եռակողմ հայտարարությունների կատարումը»։
«Ադրբեջանի երկարաժամկետ ռազմավարության տեսլականի հիմքը կայուն խաղաղության, զարգացման ու առաջընթացի հաստատումն է։ «Տարածքների օկուպացիայի վերացումով» Ադրբեջանը պատրաստ է Հայաստանի հետ հարաբերությունները կարգավորել միջազգային իրավունքի սկզբունքների, մասնավորապես՝ ինքնիշխանության, տարածքային ամբողջականության ու միջազգային սահմանների անխախտելիության սկզբունքների խստագույն պահպանմամբ։ Այս փուլում տարածաշրջանում ապագա խաղաղության ու կայունության ապահովման համար կարևոր է եռակողմ հայտարարությունների դրույթների ամբողջական կատարումը, և Ադրրեջանն ակնկալում է, որ Հայաստանն ադեկվատ կերպով կարձագանքի այս ուղղությամբ իրականացված քայլերին»,- ասվում է հայտարարության մեջ։
Նշենք, որ ադրբեջանական կողմը շարունակում է խախտել նոյեմբերի 9-ի եռակողմ հայտարարության դրույթները և չի վերադարձնում հայ բոլոր ռազմագերիներին ու պատանդներին։
Բացի այդ, Ադրբեջանի ԱԳՆ-ն սպառնալիքներ ու պահանջներ է ներկայացնում Հայաստանին։
«Հարավային Կովկասում հակամարտության ավարտմամբ առաջացել են նոր իրողություններ, և բոլորը պետք է ընդունեն այդ իրողությունները։ Հայաստանը պետք է ընտրություն կատարի տարածաշրջանային համագործակցության և իր հարևանների նկատմամբ անօրինական ու անհիմն տարածքային պահանջների առաջադրման միջև։ Միջազգային հանրությունը պետք է դրական դերակատարում ունենա այդ հարցում և կոչ անի Հայաստանին՝ գիտակցել, որ խաղաղությանն այլընտրանք գոյություն չունի։ Պետք է վերջ դնել Հայաստանում ռևանշիզմի ուղղակի կամ անուղղակի աջակցման փորձերին»,- ասվում է Ադրբեջանի ԱԳՆ-ի տարածած հայտարարության մեջ։
Հարկ է նկատել, որ ի տարբերություն Բաքվի, որը ՀՀ մայրաքաղաք Երևանը ներկայացնում է, որպես «Ադրբեջանի պատմական տարածք» ու խոսում Հայաստանի տարբեր մարզերի գրավման մասին, պաշտոնական Երևանը իր հարևան որևէ պետության նկատմամբ տարածքային պահանջներ չի ներկայացրել։
Էմմա Չոբանյան
