Առուշ Առուշանյանը կտեսակցի հարազատներին, սակայն չի կարողանա զանգեր կատարել․ գործով դատարանում են «Հայաստան» խմբակցության պատգամավորներ

Սյունիքի մարզի ընդհանուր իրավասության դատարանի Գորիսի նստավայրում Գնել Գասպարյանի նախագահությամբ շարունակվում է Գորիսի համայնքապետ Առուշ Առուշանյանին առնչվող քրեական գործերի միացված վարույթի քննությունը։

Առուշանյանի պաշտպան Էրիկ Ալեքսանյանը լրագրողների հետ զրույցում նշեց, որ դատարանը որոշում է կայացնելու տեսակցությունների և հեռախոսազանգերի արգելքի վերաբերյալ: Իսկ մեղադրական եզրակացությունը դատարանում ներկայացնելուց հետո պաշտպանական կողմը կմիջնորդի՝ Առուշանյանի խափանման միջոց կալանքն ավելի մեղմ միջոցով՝ գրավով կամ երաշխավորությամբ փոխարինելու վերաբերյալ։ Անձնական երաշխավորություն ներկայացնելու և համայնքապետին աջակցելու համար դատարանում են ՀՀ ԱԺ «Հայաստան» խմբակցության մի քանի պատգամավորներ՝ Արթուր Ղազինյանը, Վահե Հակոբյանը, Աննա Գրիգորյանը, Արամ Վարդևանյանը, Արթուր Սարգսյանը և Աղվան Վարդանյանը։

Պաշտպանները միջնորդել էին նաև Առուշ Առուշանյանին «Երևան-Կենտրոն» ՔԿՀ-ից «Գորիս» ՔԿՀ տեղափոխել։ Էրիկ Ալեքսանյանի պատճառաբանմամբ՝ գործերից մեկով որպես տուժողի շահերի իրավահաջորդ ներկայացող Ներսես Խաչատրյանը մյուս գործով ունի վկայի դատավարական կարգավիճակ, այնինչ քրեական դատավարության օրենսդրությունը չի նախատեսում, որ քրեական վարույթի շրջանակում անձը կարող է ունենալ երկու դատավարական կարգավիճակ։ Միևնույն ժամանակ, պաշտպանության կողմը գտնում է, որ Խաչատրյանի՝ վարույթից հեռացման հարցը կարող է քննարկվել նաև դատավարության հաջորդ փուլում։

Խորհրդակցական սենյակից վերադառնալով՝ դատարանը որոշեց թույլատրել տեսակցություն, սակայն մերժեց քրեակատարողական հիմնարկը փոխելու և զանգերի հնարավորությունը։
Հիշեցնենք, որ ի սկզբանե դատավոր Գնել Գասպարյանի վարույթում է եղել արտահերթ խորհրդարանական ընտրությունների ավարտից հետո հարուցված քրեական գործը՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ։

Սույն գործի շրջանակում հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Մյուս քրեական գործը, որը միացվել է այս վարույթին, ավելի վաղ է ուղարկվել դատարան և քննվում էր Սյունիքի մարզի ընդհանուր իրավասության դատարանի նախագահ Նապոլեոն Օհանյանի վարույթում։ Սույն գործով որպես մեղադրյալ ներգրավելու մասին որոշման համաձայն՝ Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն:

Ռոզա Վարդանյան