08.06.2026 | 21:59
Վստահ եմ, որ Հայաստանի և Իրանի հարաբերությունները նոր շրջանում էլ կշարունակեն ամրապնդվել. Փեզեշքիան
ՆԱՏՕ-ի նախկին քարտուղարը պատմել է, որ Պուտինը ցանկացել է անդամակցել ՆԱՏՕ-ին․ The Guardian
Քաղաքականություն
04.11.2021 | 17:25
ՆԱՏՕ-ի նախկին գլխավոր քարտուղար Ջորջ Ռոբերթսոնը հայտարարել է, որ ՌԴ նախագահ Վլադիմիր Պուտինը ցանկանում էր, որ Ռուսաստանը միանա ՆԱՏՕ-ին, սակայն չէր ցանկանում, որ իր երկիրը ստիպված լինի անցնել սովորական դիմումի ընթացակարգով և հերթ կանգնել «բազմաթիվ ոչ կարևոր երկրների հետ», գրում է The Guardian-ը:
Բրիտանական Լեյբորիստական կուսակցությունից պաշտպանության նախկին նախարար Ջորջ Ռոբերթսոնը, որը ՆԱՏՕ-ն ղեկավարել է 1999-2003 թվականներին, պատմել է, որ Պուտինն իրենց առաջին հանդիպման ժամանակ հստակ ասել է, որ ցանկանում է՝ Ռուսաստանը լինի Արևմտյան Եվրոպայի մաս:
«Նրանք ցանկանում էին լինել այն ապահով, կայուն, բարգավաճ Արևմուտքի մի մասը, որից այդ ժամանակ Ռուսաստանը բացակայում էր»,- ասել է նա:
Լեյբորիստը հիշել է Պուտինի հետ իր վաղեմի հանդիպումը, որը Ռուսաստանի նախագահ էր դարձել 2000 թվականին:
Ըստ նրա՝ Պուտինը հարցրել է՝ «ե՞րբ եք հրավիրելու մեզ միանալ ՆԱՏՕ-ին», իսկ Ռոբերթսոնը պատասխանել է․ «Դե՝ մենք չենք հրավիրում միանալ ՆԱՏՕ-ին, նրանք են դիմում՝ ՆԱՏՕ-ին անդամակցելու համար»: Ի պատասխան՝ Պուտինն ասել է. «Դե՝ մենք հերթ չենք կանգնի բազմաթիվ աննշան երկրների հետ»:
The Guardian-ը նշում է, որ այս հայտարարությունները համընկնում են այն ամենի հետ, ինչ Պուտինը BBC-ին տված հարցազրույցում ասել էր հանգուցյալ Դեյվիդ Ֆրոսթին ավելի քան 21 տարի առաջ՝ նրա առաջին երդմնակալությունից անմիջապես առաջ: Այն ժամանակ Պուտինը հայտարարել էր, որ չի բացառի ՆԱՏՕ-ին անդամակցությունը, եթե «Ռուսաստանի տեսակետները հաշվի առնվեն որպես իրավահավասար գործընկերոջ»:
Տաթև Ֆռանգյան
