«Բայրաքթար»-ի հարվածներից ռուսները վայնասուն են բարձրացրել՝ Թուրքիային չեն քննադատում․ մտածե՛ք՝ ինչո՞ւ դա տեղի ունեցավ․ Էմիլ Օրդուխանյան․ ՏԵՍԱՆՅՈՒԹ

Factor TV-ի հարցազրույցը քաղաքագետ Էմիլ Օրդուխանյանի հետ

-Պարո՛ն Օրդուխանյան, Դուք հայտարարում եք, որ ԱՄՆ-ն թույլ չի տա՝ հարավկովկասյան տարածաշրջանը մնա ռուս-թուրքական առևտրի հույսին։ Հայաստանում է ԱՄՆ պետքարտուղարի Եվրոպայի և Եվրասիայի գործերով փոխտեղակալ Էրիկա Օլսոնը։ Նա այստեղ մասնակցում է Հարավային Կովկասում ԱՄՆ առաքելությունների ղեկավարների համաժողովին։ ԱՄՆ-ն նաև ընդդիմանում է «3+3» ձևաչափին։ Ինչո՞ւ, Ձեր նշած առևտուրը թույլ չտալու նպատակո՞վ։

-Դա պատճառներից մեկն է, բայց առանցքային պատճառն այդ «3+3»-ով Արևմուտքին խաղից դուրս թողնելն է։ Եկեք հիշենք, որ մինչև Պետքարտուղարության այս պաշտոնյայի այցը Հայաստան, Վրաստան եկավ Պենտագոնի ղեկավարը։

-Ես ուղղակի հիշեցնեմ՝ Պենտագոնի ղեկավար Լլոյդ Օսթինը Վրաստանում ասել էր, որ նախ ՌԴ-ն թող իր պարտավորությունները կատարի՝ այս ձևաչափերից առաջ։ Զախարովան հայտարարեց, թե ԱՄՆ-ն փորձում է խանգարել «3+3»-ի իրագործմանը, և որ դրա հեղինակը Ադրբեջանն ու Թուրքիան են։ Ի՞նչ ունենք մենք անելու։

-Մենք պետք է հաշվարկներին նայենք։ Տեսե՛ք, ՌԴ-ի դիրքորոշումը մեղմացավ այն բանից հետո, երբ ուկրաինական ճակատում նրանք «Բայրաքթար»-ների հարվածներ ստացան, և արդեն մեկ շաբաթ է՝ ռուս փորձագետները քննարկում են, վայնասուն են բարձրացրել ՌԴ-ում, թե ինչպես և ինչու այդ ամենը տեղի ունեցավ։ Թուրքիային, սակայն, բան չեն ասում, որովհետև դա դիտում են որպես ռազմական առևտուր։ Ժողովրդական լեզվով ասած՝ «օձը տաքացնողին է կծում»։ Իրենք էլ պիտի մտածեն՝ «3+3» ձևաչափում Թուրքիայի՞, թե՞ Ռուսաստանի շահերն են իրացվելու։ ՌԴ-ն պետք է ազնիվ լինի իր դաշնակցի նկատմամբ, քանի որ շատ են խոսում, թե Հայաստանում հակառուսական տրամադրություններ են գեներացվում։ Բայց ովքեր դա ասում են, մոռանում են, որ հենց ՌԴ-ն է իր քաղաքականությամբ հակառուսական տրամադրություններ գեներացնում ՀՀ-ում։

-Եթե օբյեկտիվ հիմք չլինի, Դուք կկարողանա՞ք քննադատել ՌԴ-ին։ Եթե տեղեկանաք և տեսնեք, որ ՌԴ-ն դիվանագիտական պրոցեսում պաշտպանում է ՀՀ-ի շահերը, ինչո՞ւ պիտի քննադատեք ՌԴ-ին՝ Դուք կամ մյուս գործիչները։

-Հակառակը, մենք կխոսեինք մեր դաշնակցային հարաբերությունների հուսալիության մասին, բայց մի պահ, երբ ասում են՝ դե Արցախը ճանաչված չէր, այլ դեպք է և այլն, հիմա փաստ է, չէ՞, որ Ադրբեջանը Հայաստանի տարածքներից ներս է գտնվում, և մեր դաշնակիցը չի հայտնել տեսակետ այդ մասին, չի ընդունել այդ փաստը։ Հարց է առաջանում՝ ռուսական ռազմաբազան Հայաստանում ումի՞ց է պաշտպանում։ Չէ՞ որ ժողովուրդն ինքն իրեն կարող է հարցեր տալ և գտնել պատասխաններ այդ հարցերին։

Հարցազրույցն ամբողջությամբ՝ տեսանյութում։

Ռոբերտ Անանյան