ՌԴ-ում կորոնավիրուսից մահվան դեպքերի նոր հակառեկորդ է գրանցվել․ Մոսկվայում, սակայն, ոչ աշխատանքային օրերը չեն երկարացնի

Ռուսաստանում կորոնավիրուսի տարածման դեմ պայքարի օպերատիվ շտաբը հայտարարել է COVID-19-ից մահացության նոր առավելագույն օրական ցուցանիշի մասին։ Անցած 24 ժամվա ընթացքում ՌԴ-ում կորոնավիրուսային վարակի հետևանքով մահացել է 1189 մարդ, փոխանցում է DW-ի ռուսական ծառայությունը։

Նախորդ օրերին դաշնային շտաբի հրապարակած մահացության օրական ցուցանիշները միայն մի փոքր են տարբերվել իրարից։ Այսպես, նոյեմբերի 2-ին կորոնավիրուսից մահացել է 1178 մարդ, նոյեմբերի 1-ին՝ 1155, հոկտեմբերի 31-ին՝ 1158, հոկտեմբերի 30-ին՝ 1160, հոկտեմբերի 29-ին՝ 1163 մարդ։ Համաճարակի ընթացքում կորոնավիրուսից մահացածների ընդհանուր թիվը, ըստ stopcoronavirus.rf կայքի, հասել է 242․060-ի։

Ռուսաստանում վերջին 24 ժամում կորոնավիրուսով վարակվածների թիվն ավելացել է 40․443-ով՝ հասնելով 8․633․643-ի։ Երկրի այն բնակիչների թիվը, որոնք այս պահին անցել են ամբողջական պատվաստում, կազմում է 50,9 միլիոն մարդ, երկու անհրաժեշտ պատվաստումներից մեկը ստացել է առնվազն 56,8 միլիոն մարդ։

Նշենք, սակայն, որ Ռուսաստանում կորոնավիրուսից մահացածների մասին օպերատիվ շտաբի տարածած տեղեկություններն էականորեն տարբերվում են այլ պաշտոնական տվյալներից։ Այսպիսով, ըստ Ռոսստատի, որը հաշվի է առնում նաև ուղեկցող հիվանդություններ ունեցող COVID-19-ով վարակվածների մահերը, նշում է, որ միայն օգոստոսին մահացել է շուրջ 50 հազար մարդ։ Մինչդեռ օպերատիվ շտաբը օգոստոսին հայտնել է միայն 800 մահվան մասին։

Մինչ այդ, Մոսկվայի իշխանությունները հայտարարել են, որ չեն երկարացնելու ոչ աշխատանքային օրերը, որոնք սահմանվել էին հոկտեմբերի 28-ից նոյեմբերի 7-ը՝ կորոնավիրուսի տարածման հետ կապված իրավիճակով պայմանավորված, գրում է «Լենտան»։

Մոսկվայի քաղաքապետ Սերգեյ Սոբյանինը հայտարարել է, որ Մոսկվայում COVID-19-ով պայմանավորված իրավիճակը կայունացել է։

Տաթև Ֆռանգյան