Ուկրաինացի գեներալը երկրի բնակիչներին կոչ է արել` պատրաստ լինել ռազմական դրության և Պուտինին պատերազմի դեպքում արյունահեղություն խոստացել

Ուկրաինայի բնակիչները պետք է պատրաստ լինեն երկրում ռազմական դրություն հայտարարելուն։ Այս մասին «Գլավրեդ»-ում գրել է Ուկրաինայի զինված ուժերի գլխավոր շտաբի պետի նախկին տեղակալ, գեներալ Իգոր Ռոմանենկոն։ Նրա խոսքով՝ դա պայմանավորված է ռուս-ուկրաինական սահմանին տիրող իրավիճակով, գրում է «Ինոսմի»-ն։

«Ընդհանուր առմամբ, սահմանի վրա նոր կենտրոնացումն անվտանգ չէ, և Ուկրաինան, անհրաժեշտության դեպքում, պետք է պատրաստ լինի ռազմական դրություն հայտարարելուն»,- նշել է Ռոմանենկոն:

Ըստ նրա՝ Ռուսաստանը մի քանի շաբաթ է՝ զորքեր է քաշում Ուկրաինայի հետ սահմանակից շրջաններ։

Գեներալը հոդվածում գրել է, որ «եթե Պուտինը պատերազմ սկսի, ապա Ուկրաինայում նրան արյունահեղություն է սպասվում, որը չի ավարտվի տարածքների զավթմամբ»։ Ռոմանենկոն Կիևի կողմից չվերահսկվող Դոնբասը Ռուսաստանի իշխանությունների համար անվանել է «ճամպրուկ առանց բռնակի»։ Նա կարծում է, որ Մոսկվան դեռ վերջնական որոշում չի կայացրել ռազմական գործողությունների բռնկման վերաբերյալ. գեներալի խոսքով՝ Ռուսաստանը ցանկանում է այս տարածաշրջանում իրականացնել Ղրիմի սցենարը՝ նախապես հաշվարկված օպերացիա՝ տարածքներն իր վերահսկողության տակ վերցնելու համար։

Կրեմլը, ըստ Ուկրաինայի ԶՈՒ գլխավոր շտաբի պետի նախկին տեղակալի, դժգոհ է ուկրաինական բանակի կողմից թուրքական «Բայրաքթար» անօդաչու թռչող սարքերի կիրառումից․ Կիևի կողմից մարտական անօդաչու թռչող սարքերի օգտագործումը կարող է ռազմական ներխուժման պատճառ դառնալ։

Տաթև Ֆռանգյան