11.10.2026 | 12:06
Հայ զինծառայողները վարժանքներ են անցկացրել «Արամազդ» հրետանային միջոցով և նոր տեխնիկայով
Ռոբերտ Քոչարյանի մոտ առկա են կորոնավիրուսով վարակման ախտանշաններ
02.11.2021 | 16:27
Երևան քաղաքի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի նախագահությամբ քննվող ՀՀ երկրորդ նախագահ Ռոբերտ Քոչարյանի և նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով այսօրվա դատական նիստին նախկին նախագահը չէր ներկայացել։
Պաշտպան Հայկ Ալումյանը տեղեկացրեց, որ Քոչարյանի հարազատներից մեկի մոտ հայտնաբերվել է կորոնավիրուս, ախտանշաններ են ի հայտ եկել նաև Ռոբերտ Քոչարյանի մոտ։ Այսօր առավոտյան Քոչարյանը թեստ է հանձնել, որի պատասխանը դեռևս չի ստացվել։
«Ռոբերտ Քոչարյանը չի ներկայացել դատական նիստին՝ դատավարության մասնակիցներին չվարակելու համար, սակայն եթե դատարանը, այդուհանդերձ, կգտնի, որ պետք է ներկայանա դատական նիստին, ապա պարոն Քոչարյանը 15 րոպեի ընթացքում կարող է լինել դատարանի դահլիճում»,- նշեց Ալումյանը։
Մեղադրող Գևորգ Բաղդասարյանը պաշտպանական կողմին խնդրեց տեղեկություն տրամադրել նաև ախտանշանների վերաբերյալ, քանի որ պարզապես կոնտակտավոր լինելը՝ առանց ախտանշանների, չի կարող դատական նիստին չներկայանալու պատճառ դառնալ։
«Եթե այդ ախտանշանները կան, դիրքորոշումն այլ է, եթե չկան, ապա գտնում ենք, որ պետք է ներկայանա դատական նիստին, և նիստը պետք է շարունակվի»,- նշեց Բաղդասարյանը, ինչից հետո Ալումյանը, ստանալով իր պաշտպանյալի թույլտվությունը, տեղեկացրեց, որ վերջինիս մոտ առկա են գրիպին բնորոշ ախտանշաններ, ոչ բարձր ջերմություն, հոդային և մկանային ցավեր։
Դատական նիստը հետաձգվեց։ Քրեական գործի քննությունը կշարունակվի նոյեմբերի 9-ին։
Հիշեցնենք՝ Ռոբերտ Քոչարյանը և Արմեն Գևորգյանը մեղադրվում են առանձնապես խոշոր չափերով կաշառք ստանալու, նախկին փոխվարչապետը՝ նաև հանցավոր ճանապարհով ստացված գույքն օրինականացնելու համար։ Քոչարյանը մեղադրվում է 3 միլիոն դոլար, Գևորգյանը՝ 1 միլիոն դոլար կաշառք ստանալու համար:
Ռոզա Վարդանյան
