27.11.2024 | 11:38
7 ոստիկան ազատվել է աշխատանքից
COP26. համաշխարհային առաջնորդները խոստանում են վերջ տալ անտառահատումներին մինչև 2030 թվականը
Քաղաքականություն
02.11.2021 | 12:21
Աշխարհի ավելի քան 100 երկրների առաջնորդներն այսօր խոստանալու են վերջ տալ անտառահատումներն ու վերականգնել անտառները մինչև 2030 թվականը՝ COP26 կլիմայական գագաթնաժողովի առաջին խոշոր գործարքի շրջանակում։ Այս մասին գրում է BBC News-ը:
Բրազիլիան, որտեղ հատվել են Ամազոնի անտառների զգալի հատվածները, այսօր այս համաձայնագիրը ստորագրողների թվում կլինի: Ծրագրի համար ներդրումը կազմելու է գրեթե 14 միլիարդ ֆունտ (19,2 միլիարդ դոլար) պետական և մասնավոր միջոցներից:
Փորձագետները ողջունել են այս քայլը, սակայն զգուշացրել են, որ 2014 թվականին կնքված նախորդ գործարքն «ընդհանրապես չի կարողացել դանդաղեցնել անտառահատումները», և որ ձեռք բերված պարտավորությունները պետք է կատարվեն:
Ծառերի հատումը նպաստում է կլիմայի փոփոխությանը, քանի որ այն վերացնում է անտառները, որոնք կլանում են CO2 գազի հսկայական քանակություն:
Գլազգոյում ընթացող այս երկշաբաթյա գագաթնաժողովը համարվում է վճռորոշ՝ կլիմայի փոփոխությունը վերահսկողության տակ վերցնելու հարցում: Այն երկրները, որոնք կստորագրեն համաձայնագիրը, այդ թվում՝ Կանադան, Բրազիլիան, Ռուսաստանը, Չինաստանը, Ինդոնեզիան և Կոնգոյի Դեմոկրատական Հանրապետությունը, ծածկում են աշխարհի անտառների շուրջ 85%-ը:
Ֆինանսավորման մի մասը կուղղվի զարգացող երկրներին՝ վնասված հողերը վերականգնելու, անտառային հրդեհների դեմ պայքարի և տեղի համայնքներին աջակցելու համար:
28 երկրների կառավարությունները նաև պարտավորվելու են վերացնել անտառահատումները՝ արմավենու յուղ, սոյա, կակաո ստանալու համար։ Այս արդյունաբերությունները հանգեցնում են անտառների կորստի, քանի որ ծառերը հատում են՝ արոտավայրեր կամ բերքի համար տարածքներ ստեղծելու համար:
Աշխարհի ավելի քան 30 խոշորագույն ընկերություններ պարտավորվելու են դադարեցնել ներդրումները անտառահատումների հետ կապված գործունեության մեջ:
BBC-ն հայտնում է, որ կստեղծվի նաև 1,1 միլիարդ ֆունտի հիմնադրամ՝ պաշտպանելու աշխարհի երկրորդ ամենամեծ արևադարձային անտառը, որը գտնվում է Կոնգոյի ավազանում:
Տաթև Ֆռանգյան
