23.08.2026 | 10:37
Ստեփանավանում վագոն-տնակ է այրվել. կա զոհ
Սա վճռորոշ տասնամյակ է կլիմայական ճգնաժամում փոփոխության համար․ Ջո Բայդեն
Քաղաքականություն
01.11.2021 | 21:12
Այս տասնամյակը կտա հարցի պատասխանը՝ արդյո՞ք կհաղթահարվի կլիմայական ճգնաժամը, թե՞ ոչ։ Այս մասին հայտարարել է ԱՄՆ նախագահ Ջո Բայդենը՝ ելույթ ունենալով այսօր Գլազգոյում մեկնարկած ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովի (COP26) ժամանակ:
«Այս տասնամյակը պատասխանը կտա։ Սա վճռորոշ տասնամյակ է։ Կլիմայի փոփոխությունն արդեն սնանկացնում է աշխարհը։ Սա հիպոթետիկ սպառնալիք չէ, այն ավերում է մարդկանց կյանքերն ու նրանց գոյատևման աղբյուրները, այն մեր երկրների համար տրիլիոնավոր դոլարներ է արժենում»,- ասել է նա։
Հավելենք, որ ՀՀ նախագահ Արմեն Սարգսյանը ևս մեկնել է Միացյալ Թագավորություն՝ մասնակցելու Գլազգոյում կայանալիք ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26):
Գլազգոյի համաժողովը համանախագահելու են Միացյալ Թագավորությունն ու Իտալիան: Քննարկումներին մասնակցելու են պետությունների ղեկավարներ, կլիմայի փոփոխության փորձագետներ, գործարար ու քաղաքացիական հանրության առաջնորդներ: Համաժողովը նպատակ ունի մշակել կլիմայի փոփոխության դեմ պայքարի համաձայնեցված գործողությունների ծրագիր։
Տաթև Ֆռանգյան
