01.03.2026 | 01:10
Իրանը հերքում է այաթոլլա Ալի Խամենեիի սպանության մասին լուրերը
Բորիս Ջոնսոնը COP26-ի բացմանը համաշխարհային առաջնորդներին համեմատել է Ջեյմս Բոնդի հետ
Քաղաքականություն
01.11.2021 | 17:28
Գլազգոյում պարկապզուկների հնչյունների ներքո մեկնարկել է ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովը (COP26): Այն բացել է Մեծ Բրիտանիայի վարչապետ Բորիս Ջոնսոնը, գրում է BBC News-ը։
Նա համաշխարհային առաջնորդներին համեմատել է Ջեյմս Բոնդի հետ՝ ասելով, որ հերոսն իր ֆիլմերում սովորաբար պայքարում է ուժերի դեմ, որոնք փորձում են վերացնել երկիր մոլորակը։
«Ողբերգությունն այն է, որ սա ֆիլմ չէ, և երկիր մոլորակի վերջն իրական է»,- հայտարարել է նա։
Բորիս Ջոնսոնը նշել է, որ գլոբալ ջերմաստիճանի՝ երկու աստիճանով բարձրացումը կվտանգի աշխարհում սննդի մատակարարումները, երեք աստիճանով բարձրացումը կհանգեցնի ավելի շատ անտառային հրդեհների և ցիկլոնների, մինչդեռ չորս աստիճանով բարձրացման դեպքում «մենք կարող ենք հրաժեշտ տալ ամբողջական քաղաքների»:
«Որքան երկար չկարողանանք գործել, այնքան ավելի վատ և այնքան ավելի բարձր կլինի գինը, երբ, ի վերջո, աղետը մեզ ստիպի գործել։ Մարդկությունը վաղուց արդեն կրճատել է կլիմայի փոփոխության ժամացույցը, այդ ժամացույցով կեսգիշերին մեկ րոպե է մնացել, մենք պետք է գործենք հիմա»,- ասել է նա:
Հավելենք, որ ՀՀ նախագահ Արմեն Սարգսյանը ևս մեկնել է Միացյալ Թագավորություն՝ մասնակցելու Գլազգոյում կայանալիք ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26):
Գլազգոյի համաժողովը համանախագահելու են Միացյալ Թագավորությունն ու Իտալիան: Քննարկումներին մասնակցելու են պետությունների ղեկավարներ, կլիմայի փոփոխության փորձագետներ, գործարար ու քաղաքացիական հանրության առաջնորդներ: Համաժողովը նպատակ ունի մշակել կլիմայի փոփոխության դեմ պայքարի համաձայնեցված գործողությունների ծրագիր։
Տաթև Ֆռանգյան
