14.10.2026 | 20:44
Իրանամետ հաքերները ստանձնել են Ադրբեջանի դեմ կիբերհարձակման պատասխանատվությունը՝ պատճառ նշելով հիջաբ կրելու արգելքը
Ո՞ւմ համար են ցանկանում մասնավորեցնել «Երևանի հենակետային բժշկական քոլեջը»
Հասարակություն
30.03.2018 | 14:03
ՀՀ պետական գույքի կառավարման վարչությունը շրջանառության մեջ է դրել «Պետական գույքի մասնավորեցման 2017-2020 թվականների ծրագրի մասին» ՀՀ օրենքում փոփոխություն կատարելու մասին մի նախագիծ, որով առաջարկում է ՀՀ կրթության և գիտության նախարարության ենթակայության տակ գտնվող ու սեփականաշնորհման ենթակա հիմնարկների թվում ավելացնել «Երևանի հենակետային բժշկական քոլեջ» ՓԲԸ-ին։
Այլ կերպ ասած, պետական գույքի կառավարման վարչությունն առաջարկում է մասնավորեցնել «Երևանի հենակետային բժշկական քոլեջը»։
Հարկ է նշել, որ մասնավորեցման ենթակա հիմնարկների ցանկում ուսումնական հաստատությունները հատուկենտ են հայտնվում։ Տվյալ դեպքում «Երևանի հենակետային բժշկական քոլեջը» միջին մասնագիտական բժշկական կրթություն տվող ամենահին և առավել մեծ պահանջարկ վայելող ուսումնական հաստատությունն է։
Փորձը ցույց է տվել, որ սեփականաշնորհման ենթակա հաստատությունների ցանկում, որպես կանոն, ավելացվում են այն ձեռնարկությունները, որոնց դեպքում արդեն իսկ պատրաստի գնորդ կա։ Իսկ թե ով է ցանկանում գնել «Երևանի հենակետային բժշկական քոլեջը» թերևս պարզ կդառնա այն ժամանակ, երբ վերջինիս մասնավորեցման հարցը ավելի առարկայական կքննարկվի, այն է՝ նախագիծը կառավարությունում հաստատվելուց հետո կուղարկվի խորհրդարան։
Վահագն Հովակիմյան
