Քաղաքականություն
29.10.2021 | 18:23ԱՄՆ նախագահ Ջո Բայդենը ժամանել է Հռոմ՝ հոկտեմբերի 30-31-ը կայանալիք G20-ի գագաթնաժողովին մասնակցելու և մի քանի հանդիպումներ ունենալու համար։ Այսօր Սպիտակ տան ղեկավարը Վատիկանում հանդիպել է Հռոմի Ֆրանցիսկոս պապին։
СNN-ի հաղորդմամբ՝ ԱՄՆ նախագահն ու Հռոմի պապը զրուցել են շուրջ 90 րոպե, ինչը երկու անգամ ավելի է, քան Հռոմի Հովհաննես Պողոս 2-րդ պապի հետ նախագահի առաջին հանդիպումներն էին։
Ֆրանցիսկոս պապի հետ հանդիպումից առաջ Ջո Բայդենը կարճ շփում է ունեցել Պապական տան անձնակազմի հետ։ Ողջունելով իրեն դիմավորողներին՝ Բայդենը գերադասել է ներկայանալ ոչ թե որպես ԱՄՆ նախագահ, այլ որպես «Ջիլի ամուսին»։ ԱՄՆ նախագահի կինը՝ Ջիլ Բայդենը, ուղեկցել է ամուսնուն հանդիպման ժամանակ։
Ջո Բայդենի և Հռոմի պապի հանդիպման մանրամասները դեռևս հայտնի չեն, քանի որ համատեղ հայտարարությունների հեռարձակումը չեղարկվել է։
Սպիտակ տան տարածած հաղորդագրության համաձայն՝ ԱՄՆ նախագահ Ջո Բայդենը և Հռոմի Ֆրանցիսկոս պապը Վատիկանում քննարկել են կլիմայի փոփոխության դեմ պայքարը, կորոնավիրուսային համաճարակը և համաշխարհային տնտեսության վերականգնումը։
«Բայդենը շնորհակալություն է հայտնել Նորին Սրբությանը՝ աղքատներին, սովից, հակամարտություններից և հալածանքներից տառապողներին աջակցելու համար: Նա գովաբանել է Հռոմի պապ Ֆրանցիսկոսին կլիմայական ճգնաժամի դեմ պայքարում իր առաջնորդության, ինչպես նաև պատվաստանյութերի փոխանակման և համաշխարհային տնտեսության արդար վերականգնման միջոցով համաճարակի ավարտն ապահովելու իր աշխատանքի համար»,- ասված է հայտարարության մեջ։
Տաթև Ֆռանգյան
