23.08.2026 | 12:20
Նաիր Թիկնիզյանը նորամուտն է նշել «Օլիմպիակոսում»
«Մարդն ունի ինքնասպանության իրավունք»․ Վրաստանի վարչապետը՝ Սաակաշվիլիի հացադուլի մասին
Քաղաքականություն
29.10.2021 | 15:05
Վրաստանի իշխանությունները հրաժարվում են հացադուլ հայտարարած նախկին նախագահ Միխեիլ Սաակաշվիլիին բանտից մասնավոր կլինիկա տեղափոխել, քանի որ վախենում են բուժհաստատությունում անկարգություններից։ Այս մասին վրացական «Իմեդի» հեռուստաընկերությանը տված հարցազրույցում ասել է Վրաստանի վարչապետ Իրակլի Ղարիբաշվիլին, գրում է Նովոստի Գրուզիան։
Վարչապետի պնդմամբ՝ հոսպիտալացումը քաղաքացիական հիվանդանոցում, որտեղ «անվտանգության պայմաններ չկան», «Սահակաշվիլիի ծրագրի մի մասն է»։
«Նրա ծրագրի համաձայն՝ իրեն պետք է տեղափոխենք մասնավոր կլինիկա։ Ավելին, նրանց ծրագիրն է մոբիլիզացնել մի քանի հազար մարդ՝ 4-5 կամ 10 հազար։ Մենք ստիպված կլինենք տեղակայել ոստիկանություն, կիրառել հատուկ միջոցներ և մնալ հավերժական քաոսի ու անկարգությունների մեջ»,- ասել է Ղարիբաշվիլին։
Մեկնաբանելով նախկին նախագահի հացադուլը՝ նա նաև ասել է, որ «մարդն ունի ինքնասպանության իրավունք», և պետությունը պատասխանատվություն չի կրում դրա համար։
«Օրենքն ասում է, որ մարդն ունի ինքնասպանության իրավունք։ Եթե մարդը որոշի ինքնասպան լինել, կարող է ինքն իրեն սպանել, բայց, բնականաբար, պետությունը պատասխանատվություն չի ստանձնի դրա համար»,- ասել է նա։
Վրաստանի կառավարության ղեկավարը բացառել է նաև Սաակաշվիլիի Ուկրաինա տեղափոխումը կամ վաղաժամկետ ազատումը։ Ղարիբաշվիլիի խոսքով՝ դա կնշանակի, որ «կառավարությունը չի հարգում երկրի օրենքները»։
Տաթև Ֆռանգյան
