Քաղաքականություն
29.10.2021 | 12:19
Վրաստանի բանտարկված նախկին նախագահ Միխայիլ Սահակաշվիլիին թույլ են տվել զրուցել փաստաբանների հետ և փաստաթղթեր փոխանակել։ Դրանից հետո Սաակաշվիլին հետ է կանգնել նախկինում հայտարարված բողոքի ծայրահեղ ձևից՝ հրաժարում բժշկական օգնությունից, հետազոտություններից և այլն։ Այս մասին լրագրողներին ասել է Սաակաշվիլիի փաստաբաններից Դմիտրի Սաձաղիշվիլին Ռուսթավիի բանտում իր պաշտպանյալի հետ հանդիպումից հետո, գրում է Նովոստի Գրուզիան։
«Մենք հնարավորություն ունեցանք շփվելու այնպիսի ձևաչափով, որը բացառում է խոսակցության ձայնագրությունը Պետական անվտանգության ծառայության կողմից։ Ելնելով դրանից՝ Սաակաշվիլին հրաժարվել է սրել իր բողոքի ձևը՝ հրաժարվել բուժումից, անալիզներից և այլ բաներից։ Ներկայում բողոքը սպառվել է, և նա կշարունակի շփվել բժիշկների հետ»,- ասել է Սաձաղլիշվիլին։
Փաստաբանն ընդգծել է, որ Միխայիլ Սաակաշվիլին ևս մեկ անգամ վերահաստատել է իր հարգանքը խորհրդի անդամ բժիշկների նկատմամբ, ներողություն է խնդրել բողոքի ակցիայի պատճառով մի քանի ժամ նրանց հետ հանդիպելուց հրաժարվելու համար և պատրաստակամություն հայտնել շարունակել համագործակցությունը բժիշկների, այդ թվում՝ կոնսիլիումի անդամների հետ։
Տաթև Ֆռանգյան
