Շիրակի մարզպետը, բռնցքամարտի Եվրոպայի չեմպիոնն ու ՀՀԿ-ի քաղաքապետի թեկնածուն ինքնաբացարկ հայտնեցին

Շիրակի մարզպետ Հովհաննես Հարությունյանը, որը Գյումրու ՏԻՄ ընտրություններում գլխավորում էր իշխող քաղաքական ուժի՝ «Քաղաքացիական պայմանագիր» կուսակցության ցուցակը, ինքնաբացարկ է հայտնել։ Այսօր ինքնաբացարկի դիմում է ներկայացրել նաև ՀՀԿ-ի ցուցակը գլխավորող Արտյոմ Ղուկասյանը։ Այս մասին Factor.am-ին տեղեկացրեց թիվ 31 ընտրատարածքային հանձնաժողովի նախագահ Տիգրան Ղազարյանը։

«Բալասանյան դաշինք» կուսակցությունից էլ ինքնաբացարկի դիմում է ներկայացրել  Մեխակ Ղազարյանը, որը բռնցքամարտի ԽՍՀՄ եռակի չեմպիոն է, Եվրոպայի չեմպիոն, աշխարհի գավաթակիր։ Նա զբաղեցնում է Գյումրու համայնքապետարանի սպորտի բաժնի պետի պաշտոնը։

ՔՊ-ի ցուցակից ինքնաբացարկի դիմում է ներկայացրել նաև 21-րդ համարը՝ Մառա Հարությունյանը, որը «Կարիտաս Արեգակ» բարեգործական հիմնադրամի հոգեբանն է։

Տիգրան Ղազարյանը նաև հայտնեց, որ վաղը ժամը 14։00-ին թիվ 31 ընտրատարածքային հանձնաժողովում քաղաքական ուժերի լիազոր ներկայացուցիչներին կհանձնեն մանդատները։

Թե ինչո՞ւ է Հովհաննես Հարությունյանն ինքնաբացարկի դիմում ներկայացրել, այսօր պարզաբանում ստանալ չհաջողվեց․ նա չարձագանքեց մեր հեռախոսազանգերին, Շիրակի մարզպետարանում նույնպես նրան տեսնել չհաջողվեց։

Իսկ ՀՀԿ-ական Արտյոմ Ղուկասյանը որոշումը բացատրեց կուսակցական ծանրաբեռնված գործունեությամբ։ Նա, նախքան ՏԻՄ ընտրությունները, ընտրվել էր ՀՀԿ Գյումրի շրջանային կազմակերպության խորհրդի ղեկավար։

«Գերադասեցի զբաղվել կուսակցական աշխատանքով։ Որպես ՀՀԿ-ի քաղաքային և մարզային կառույցի ղեկավար՝ ծանրաբեռնված եմ»,- ասաց Արտյոմ Ղուկասյանը։

Ղուկասյանի փոխարեն մանդատ կստանա ՀՀԿ-ի ավագանու ցուցակի երրորդ համարը՝ Հասմիկ Մարգարյանը։

Արմիկ Մովսիսյան