«Հարգանքով վերաբերվեք ՀՀ քաղաքացուն, ով գերադասել է մնալ այստեղ և կարտոֆիլ ուտել». Վլադիմիր Վարդանյանը՝ Էլինար Վարդանյանին․ ՏԵՍԱՆՅՈՒԹ

ԱԺ նիստում «Քաղաքացիական պայմանագրի» կողմից ՀՀ կենտրոնական բանկի խորհրդի անդամի պաշտոնում Արտակ Մանուկյանի թեկնածության հարցի քննարկման ժամանակ «Քաղաքացիական պայմանագիր» խմբակցության պատգամավոր Վլադիմիր Վարդանյանն անդրադարձավ «Հայաստան» դաշինքի պատգամավոր Էլինար Վարդանյանի ելույթին:

«Եկել եք ասում եք՝ ոչ բոլորն են կարողանում միս ուտել, ոչ բոլորն են կարողանում իրենց ավելի մեծ շռայլություններ թույլ տալ, մարդիկ կան՝ կարտոֆիլ են ուտում: Ես կուզենայի նախ մի փոքր ավելի հարգանքով վերաբերվել ՀՀ այն քաղաքացուն, որը գերադասել է մնալ ՀՀ-ում, այո, զրկանքների մեջ, այո, կարտոֆիլ ուտել, բայց երկիր կերտել, գերադասել է մնալ այստեղ, ոչ թե հաշիվները տեղափոխել օտարերկրյա տարբեր բանկեր: Ես կուզենայի հարգանքով վերաբերվել մեր զինվորին, որի սննդակարգում կարտոֆիլը կա և կմնա»,- նշեց Վլադիմիր Վարդանյանը:

Հիշեցնենք՝ ԱԺ նիստում այսօր դիմելով ՀՀ կենտրոնական բանկի խորհրդի անդամի պաշտոնում առաջադրված թեկնածու Արտակ Մանուկյանին՝ «Հայաստան» դաշինքի պատգամավոր Էլինար Վարդանյանն անդրադարձավ գնաճին և նշեց, որ քաղաքացին իր առօրյա կյանքում չի տեսնում գնաճի զսպման գործիքակազմի կիրառում:

Արտակ Մանուկյանն արձագանքեց՝ նշելով, որ բանջարեղենի գնաճը մեծապես պայմանավորված է կարտոֆիլի գնի բարձրացմամբ. «Այս շոկը ողջ աշխարհում է, և երկրները քննարկում են, թե ինչպես մեղմացնեն գնաճը»։

Էլինար Վարդանյանն արձանագրեց․ «Երբ ասում եք, որ կարտոֆիլն է թանկացել, մնում է իշխող քաղաքական ուժի վարչապետի նման ասեմ՝ կարտոֆիլ չկա, խառը կանաչի կերեք… Ձեր ասածը պատասխան չի։ Ուզում եք ասեք՝ ժողովուրդ, եթե կարտոֆիլը թանկացել է, կանաչին չի թանկացել, կանաչի կերե՞ք։ Թանկացել են կենսական նշանակության ապրանքները՝ միսը, հացաբուլկեղենը, կարտոֆիլը… Մարդիկ ավելի վատ են ապրում, քան երեկ: Մեր երկրում գնաճը, միջազգային գների հետ համեմատած, շատ անհամարժեք է»։

Մանրամասները՝ տեսանյութում: