18.01.2026 | 20:50
Սիրիայի բանակը անցել է Եփրատը և հարձակվել քրդերի դիրքերի վրա
Միխայիլ Սաակաշվիլիի ուկրաինացի փաստաբանին թույլ չեն տվել մուտք գործել Վրաստան
Քաղաքականություն
27.10.2021 | 14:09
Վրաստանի նախկին նախագահ Միխայիլ Սաակաշվիլիի ուկրաինացի փաստաբանին թույլ չեն տվել մուտք գործել Վրաստան և Թբիլիսիի միջազգային օդանավակայանից հետ են ուղարկել Կիև։ Այս մասին հայտնում է «Ինտերֆաքս-Ուկրաինան»։
Փաստաբանը պատմել է, որ սահմանապահները վերցրել են իր անձնագիրն ու առանց բացատրության իրեն վերադարձրել են Թբիլիսիից Կիև թռչող ինքնաթիռ։
«Իմ անձնագիրը փոխանցել են ինքնաթիռի օդաչուին։ Ես ցանկանում էի փաստաբանական օգնություն տրամադրել Սաակաշվիլիին, սակայն, ցավոք, չեմ կարողանա դա անել։ Ես վերադառնում եմ Կիև և կպարզեմ, թե ինչու ինձ թույլ չեն տվել մուտք գործել Վրաստան»,- ընդդիմադիր «Pirveli TV»-ի եթերում հեռախոսով հայտնել է փաստաբանը, որը, սակայն, չի հայտնել իր անունը։
Հիշեցնենք, որ Միխայիլ Սաակաշվիլին Ուկրաինայից հեռացել և լաստանավով Վրաստան է մուտք գործել սեպտեմբերի 28-ին՝ թաքնվելով բեռնատարում, որը կաթնամթերք է տեղափոխել։ Սաակաշվիլին Վրաստանում ձերբակալվել է հոկտեմբերի 1-ին․ հայրենիքում նա մի քանի քրեական գործերով է անցնում։ Նախկին նախագահին հեռակա դատապարտել են բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործերով: Առաջին դեպքում Սաակաշվիլիին դատապարտել են 3 տարվա, երկրորդ գործով՝ 6 տարվա ազատազրկման։ Ազատազրկման օրվանից ի վեր Սաակաշվիլի հացադուլ է հայտարարել և հրաժարվում է հոսպիտալացվել բանտային հիվանդանոցում։
Տաթև Ֆռանգյան
