Մեր երկիրն ունեցել է կորոնավիրուսային հիվանդության մի քանի ալիք, այժմ 4-րդ ալիքի փուլում ենք գտնվում: Այս մասին ԱԺ-ում հայտարարությունների ժամին ասաց «Քաղաքացիական պայմանագիր» խմբակցության պատգամավոր, ՀՀ առողջապահության նախկին նախարար Արսեն Թորոսյանը:
«Մենք ունեցել ենք հազարավոր զոհեր: Երեկ մահացած 57 հոգուց յուրաքանչյուրը որևէ մեկի մայրն է, հայրը, քույրը կամ եղբայրը:
Ի ուրախություն բոլորիս՝ կորոնավիրուսի դեմ պայքարելու և միլիոնավոր մարդկային կյանքեր փրկելու համար ստեղծվել է պատվաստանյութ:
Մեր երկրում այս պահին փաստացի լիարժեք պատվաստվածների թիվը կազմում է 7 տոկոս, իսկ առնվազն մեկ դեղաչափ ստացել է բնակչության մոտ 16 տոկոսը»,- նշեց Թորոսյանը:
Նրա խոսքով՝ դա շատ հեռու է ցանկալի ծածկույթից, որպեսզի մենք համավարակը համարենք հաղթահարված:
«Բարեբախտաբար, մեր պետությունն ամբողջովին անվճար ապահովում է COVID-19-ի պատվաստանյութերի հասանելիությունն այնպես, ինչպես տարիներ շարունակ ապահովել է այլ պատվաստանյութերինը: Ավելին, մեր քաղաքացիները կարող են ընտրություն կատարել մի քանի պատվաստանյութերի միջև: Այժմ պատվաստանյութերի բարձր ցուցանիշ ունենալու պարագայում մենք իրական շանս ունենք վերադառնալու մեր նախկին նորմալ կյանքին, բացի այդ, պատվաստանյութը, ըստ էության, միակ զենքն է, որով հնարավոր է պայքարել այս հիվանդության ահագնացող դեպքերի և մահերի դեմ: Ըստ վիճակագրության՝ այս պահին աշխարհի բնակչության մոտ 38 տոկոսը լիարժեք պատվաստված է: Շատ երկրներում պատվաստվել է բնակչության 70 և ավելի տոկոսը»,- ասաց նա:
Մանրամասները՝ տեսանյութում:
