ԱԱԾ-ն վստահություն չներշնչող կառույց է․ ինչո՞ւ են խոշտանգման գործերը տեղափոխվում այստեղ․ Ալեքսանյան. ՏԵՍԱՆՅՈՒԹ

ԱԱԾ-ն վստահություն չներշնչող կառույց է․ ինչո՞ւ են խոշտանգման գործերը տեղափոխվում այստեղ: Այս մասին «Խոշտանգման գործերի նախաքննությունը փոխանցվում է ԱԱԾ քննիչներին. հետընթաց խոշտանգումների դեմ պայքարո՞ւմ» թեմայով կազմակերպված առցանց քննարկման ժամանակ այս մասին նշեց «Լրագրողներ հանուն մարդու իրավունքների» ՀԿ-ի նախագահ Ժաննա Ալեքսանյանը:

«Դա բացահայտ անտարբեր և անլուրջ մոտեցում է խոշտանգման գործերին»,- ընդգծեց իրավապաշտպանը: -ԱԱԾ-ն դեռ սովետական ԱԱԾ-ից  շատ չի առանձնացել և այնպես չէ, որ անկախ մարմին է դարձել, որ այդպիսի վստահություն ունենա՝ զբաղվլու խոշտանգումների գործերով»:

«Խորհրդարանում վարչապետն ասում է՝ ի՞նչ է ոստիկանությունում խոշտանգում կա՞, ձեզ ուտո՞ւմ են: Այո՛, ուտում են, ուղղակի ինքը տեղյակ չէ: Կամ ասում է՝ քրեակատարողական հիմնարկներում այլևս անմեղ մարդ չկա, և այս հայտարարություններով բավարարվում է: Իսկ թե մարդիկ ինչ տառապանքների ու ստորացումների են ենթարկվում, ինչպես է նվաստացվում մարդկանց արժանապատվությունը, այդ խնդիրները մեր երկրում առաջնային չեն»,- նշեց իրավապաշտպանը:

Նրա դիտարկմամբ՝ երբ որ մեր երկրում թիվ մեկ խնդիր կդառնա խոշտանգումից զերծ մնալը, այդ ժամանակ կարձանագրվի, որ կես քայլ առաջ ենք գնացել:

«Երբ որ վարչապետը հայտարարում է «երկիր առանց բռնության», մակերեսային մոտեցում է ցուցաբերում, իսկ ո՞վ պետք է դա անի, իրավապահ համակարգը չի աշխատում: Այդ առումով մեր երկրում հուսահատեցնող է վիճակը:

Միջազգային կառույցները երբ որ տեղեկանան, որ ԱԱԾ-ի վերահսկողությանն է անցել խոշտանգումների գործերը, երկրի հեղինակությունը կնվազի, դա ուղղակի ծիծաղ կառաջացնի մեր երկրի նկատմամբ»,- նշեց Ալեքսանյանը:

Մանրամասները՝ տեսանյութում: