Տնտեսություն
26.10.2021 | 10:53Էկոնոմիկայի նախարար Վահան Քերոբյանն այսօր Ազգային ժողովում հիշեցրեց, որ 13 ամիս առաջ հայտարարվեց ռազմական դրություն ու ինքն իր եղբայրների հետ գնաց զինկոմիսարիատ՝ մեկնելու պատերազմ:
«44 օրվա ու դրանից հետո ևս 8 օրվա ընթացքում ես ամեն օր տեսել եմ, թե ինչպես ենք մենք անպատրաստ եղել պատերազմին: Թե որպես մարդ, թե որպես բանակ, թե որպես երկիր մենք չենք կարողացել 26 տարվա ընթացքում ամրապնդել մեր հայրերի հաղթանակն ու ցեմենտել այն», – ասաց նախարարը:
Նա նշեց, թե այնպես է ստացվել, որ պատերազմ գնալիս պայուսակում թողել էր «Յուրահատուկները. հաջողության պատմությունը» գիրքը:
Նախարարն ասաց, թե գրքում պատմություն է այն մասին, թե ինչքան կարևոր է մարդու ծննդյան ամսաթիվը Կանադայում, Չեխիայում ու շատ այլ երկրներում, որ հաջողության հասնեն հոկեյում կամ ֆուտբոլում:
«Այստեղ պատմություն է այն մասին, թե ինչքան կարևոր նշանակություն է ունեցել Բիլ Գեյթսի, Սթիվ Ջոբսի հաջողության համար այն, որ իրենք ծնվել են 1955 թվականին: Այս գրքի ամեն տողում գրված է անխոնջ աշխատանքի մասին որպես հաջողության հասնելու միակ ձև», – ասաց նա:
Քերոբյանի խոսքով՝ ամանորյա տոները կրճատելու մասին իրենց ներկայացրած նախագիծը զուտ տեխնիկական կամ տնտեսական նախագիծ չէ, այն քաղաքակրթական նախագիծ է:
«Ազգային ժողովը պետք է ազդարարի աշխատանքի՝ որպես հաջողության հասնելու միակ հնարավոր ճանապարհի մասին: Խոսքերս ուզում եմ ավարտել այս գրքի կարմիր թելը հանդիսացող չինական ասացվածքով՝ «Չկա մեկը, ով տարվա մեջ 360 օր անցնում է աշխատանքի արևածագից առաջ ու չի դարձնում իր ընտանիքը հարուստ»: Պետք է անցնենք աշխատանքի», – նշեց նախարարը:
Մանրամասները՝ տեսանյութում:
