26.11.2024 | 17:38
Բրյուսելը պնդում է, թե Ադրբեջանը ռուսական գազը չի վերարտահանում ԵՄ․ POLITICO
Ընդերքօգտագործող կազմակեպությունները վարչապետի ուշադրության կենտրոնում են. արձանագրվել են անճշտություններ
Տնտեսություն
29.03.2018 | 11:57
ՀՀ վարչապետ Կարեն Կարապետյանն այսօր մինչ կառավարության նիստի օրակարգի հարցրերին անցնելը անդրադարձավ ընդերքօգտագործման իրավունքով տրամադրված տեղամասերի ճշգրտման մեխանիզմներին:
Ըստ Կարապետյանի՝ իրականացված ուսումնասիրությունների արդյունքում արձանագրվել են ընդերքօգտագործման իրավունքով տրամադրված տեղամասերի, հողամասերի կոորդինատների անճշտություններ և անհամապատասխանություններ։
«Ստեղծված իրավիճակը խնդիրներ է առաջացնում ոլորտային կազմակեպությունների բնականոն գործունեության, այդ թվում՝ սեփականության իրավունքի իրացման, ինչպես նաև ընդերքօգտագործման նկատմամբ համապատասխան պետական վերահսկողական գործառույթների իրականացման տեսանկյունից»,- շեշտեց կառավարության ղեկավարը:
Հաշվի առնելով վերոնշյալը՝ վարչապետը հանձնարարեց էներգետիկ ենթակառուցվածքների և բնական պաշարների նախարարին ու կառավարության աշխատակազմի ղեկավարին՝ յոթօրյա ժամկետում մշակել և ներկայացնել ընդերքօգտագործման իրավունքով տրամադրված տեղամասերի ճշգրտման աշխատանքների իրականացման միջգերատեսչական աշխատանքային խումբ ստեղծելու վերաբերյալ որոշման նախագիծ։
Էներգետիկ ենթակառուցվածքների և բնական պաշարների նախարարին, բնապահպանության և ընդերքի տեսչական մարմնի ղեկավարին Կարապետյանը նաև հանձնարարեց նախատեսված միջգերատեսչական աշխատանքային խումբը ձևավորվելուն պես՝ երեքամսյա ժամկետում վերհանել ընդերքօգտագործող կազմակեպություններին, հատկապես մետաղական հանածոների ոլորտում տրամադրված փաստաթղթերում առկա տեղամասերի և հողամասերի համապատասխան կոորդինատների անճշտությունները, փաստացի առկա անհամապատասխանությունները և ձեռնարկել միջոցներ դրանք վերացնելու ուղղությամբ:
Վարչապետը հորդորեց կատարված աշխատանքների մասին կառավարության աշխատակազմ պարբերաբար ներկայացնել ամփոփ տեղեկատվություն:
