Քաղաքականություն
25.10.2021 | 12:18«Խորհրդարանական ընդդիմությունը մշտապես հայտարարել է, որ պետք է օգտագործվեն թե՛ խորհրդարանական բոլոր գործիքակազմերը, թե՛ նաև արտախորհրդարանական բոլոր հնարավորությունները»,- այս մասին նշեց «Հայաստան» խմբակցության պատգամավոր Արծվիկ Մինասյանն այսօր «Հայաստան» և «Պատիվ ունեմ» խմբակցության պատգամավորների համատեղ խորհրդարանական ճեպազրույցում ներկայացնելով ընդդիմության առաջիկա քայլերը:
«Այդ գործիքներից մեկը քննիչ հանձնաժողովի գործիքն է, այս պահին օրակարգում է գտնվում Հայաստան համահայկական հիմնադրամի կողմից միջոցները օգտագործելու, Հայաստանի կառավարությանը փոխանցելու հարցը։
Խոսքն այն միջոցների մասին է, որոնք հավաքվել էին 2020 թվականի սեպտեմբերի 27-ից անմիջապես հետո և նպատակ ունեին պատերազմի շրջանում օժանդակելու մեր պետությանը։
Երկրորդ գործիքը, որը վաղվա նստաշրջանում կա, ԱԺ կանոնակարգ օրենքով և Սահմանադրությամբ նախատեսված հանրային հետաքրքրություն ներկայացնող հրատապ թեմայով քննարկումն է։ Այն վերաբերում է Ադրբեջանի հետ Հայաստանի շփման գծում տիրող իրավիճակին և դեմարկացիայի խնդիրներին։ Այս օրերին, քանի որ չափազանց մեծ տեղեկատվական հոսքերի պայմաններում այս հարցն էլ ավելի է արժևորվում, մենք մտադիր ենք ոչ միայն ունենալ ամենաարդյունավետ քննարկումներից մեկը, այլ նաև վերջում առաջադրել կոնկրետ հայտարարության նախագիծ՝ ուղղված ոչ միայն միջազգային հանրությանը, մեր քաղաքացիներին, այլև գործադիր իշխանությանը՝ իր սահմանադրական, օրինական պարտավորությունները կատարելու առումով»,- նշեց Մինասյանը։
Մանրամասները՝ տեսանյութում:
