Քաղաքականություն
21.10.2021 | 20:11
ՌԴ ԱԳՆ պաշտոնական ներկայացուցիչ Մարիա Զախարովան նշել է, որ Մոսկվան տեսնում է մի շարք արևմտյան երկրների, առաջին հերթին՝ ԱՄՆ-ի ձգտումը՝ խանգարել «3+3» տարածաշրջանային նախաձեռնությանը, խոչընդոտել նոր սկսվող այս գործընթացը։ Ըստ Զախարովայի՝ ԱՄՆ-ը զբաղված է ապատեղեկատվության տարածմամբ՝ «3+3» նախաձեռնությունը Մոսկվային վերագրելով։ Այս մասին ՌԴ ԱԳՆ ներկայացուցիչը հայտարարել է ամենշաբաթյա ճեպազրույցի ժամանակ։
«Ռուսաստանը կողմ է «3+3» խորհրդատվական տարածաշրջանային մեխանիզմի հնարավորինս շուտ գործարկմանը՝ ի շահ դրա բոլոր մասնակիցների»,- հայտարարել է ԱԳՆ պաշտոնական ներկայացուցիչ Մարիա Զախարովան։
«Մենք կարծում ենք, որ դա կօգնի բարձրացնել վստահությունը միջպետական հարաբերությունների նկատմամբ, լուծել առկա հակասությունները և բացահայտել տնտեսական, տրանսպորտային, հումանիտար ներուժը։ Մենք տեսնում ենք մի շարք արևմտյան պետությունների, առաջին հերթին՝ ԱՄՆ-ի ձգտումը՝ խոչընդոտել որոշ գործընթացների»,- հավելել է նա:
Զախարովայի խոսքով՝ «3+3»-ի ստեղծման գաղափարն առաջարկել են Ադրբեջանի և Թուրքիայի նախագահները, Ռուսաստանն իր հերթին աջակցություն է հայտնել: Նա ընդգծել է, որ Ռուսաստանի Դաշնությունը ելնում է այն բանից, որ բազմակողմ տարածաշրջանային համագործակցության զարգացումը համապատասխանում է այս ձևաչափի բոլոր ապագա մասնակիցների շահերին:
Հիշեցնենք, որ «3+3» նախաձեռնությունը ենթադրում է Հայաստանի, Ադրբեջանի, Վրաստանի, Ռուսաստանի, Իրանի և Թուրքիայի մասնակցությամբ փոխգործակցություն։
Տաթև Ֆռանգյան
