27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
538 ուսուցիչ չի հաղթահարել ատեստավորման շեմը և չի ստանա հավելավճար. նախարար. ՏԵՍԱՆՅՈՒԹ
Հասարակություն
21.10.2021 | 11:31
Կամավոր ատեստավորման համար դիմել էր 1372 ուսուցիչ, որոնցից ատեստավորման գործընթացին մասնակցել է 996-ը։ Կառավարության նիստի ժամանակ այս մասին տեղեկացրեց ԿԳՄՍ նախարար Վահրամ Դումանյանը։
Նախարարի խոսքով՝ կամավոր ատեստավորմանը մասնակցած 996 ուսուցչից 468-ը, ըստ գիտելիքների ստուգման արդյունքում ստացած միավորների, կստանա 30, 40 կամ 50 տոկոս հավելավճար։
«Ուսուցչի մեկ դրույքի միջին աշխատավարձը կազմում է շուրջ 125 հազար դրամ։ Այսպիսով 30 տոկոս հավելավճար ստացող ուսուցիչների աշխատավարձը կբարձրանա շուրջ 37 հազար դրամով, 40 տոկոս ստացածներինը՝ 50 հազար դրամով, իսկ 50 տոկոս ստացածներինը՝ 61500 դրամով»,-նշեց Դումանյանը։
Նախարարը նաև հավելեց, որ այս փուլում կամավոր ատեստավորմանը մասնակցել են 7-12-րդ դասարաններում դասավանդող ուսուցիչները՝ 7 առարկաների գծով, այդ թվում հայոց լեզու և գրականություն, հայոց պատմություն, հանրահաշիվ, երկրաչափություն, ֆիզիկա, քիմիա, կենսաբանություն և աշխարհագրություն։
ՀՀ վարաչապետ Նիկոլ Փաշինյանը նկատեց՝ ստացվում է, որ 538 ուսուցիչ ատեստավորումը չի անցել։
Նախարարը նշեց, որ ամենաբարձր ցուցանիշը գրանցվել է մաթեմատիկա առարկայից, ատեստավորմանը մասնակցած ուսուցիչների 87 տոկոսը հաղթահարել է շեմը. «Հաջորդ լավ արդյունքը գրանցվել է ֆիզիկա առարկայից, այնուհետև հայոց լեզու առարկայից։ Ամենացածր ցուցանիշը գրանցվել է քիմիա առարկայից՝ 11 տոկոս և աշխարհագրություն առարկայից՝ 20 տոկոս»։
Մանրամասները՝ տեսանյութում:
