Մուրադովն առանց Հայաստանի ինչպե՞ս կարող է որևէ բան անել. Անդրանիկ Քոչարյան․ ՏԵՍԱՆՅՈւԹ

Այսօր լրագրողների հետ զրույցում «Հայաստան» խմբակցության պատգամավոր Վահե Հակոբյանը, որպես սյունեցի պատգամավոր, անդրադառնալով հարցին՝ Փայլասարն արդյոք ադրբեջանցիների վերհսկողության տա՞կ է գտնվում, թեև ՊՆ հերքում է այդ տեղեկությունը, պատասխանեց, որ Կապանի քաղաքապետը շատ մանրակրկիտ քարտեզի վրա բացատրել է այսօրվա ռեալ պատկերը:  Ավելին՝ Հակոբյանը նաև նշեց, որ Շիկահող, Ճակատեն, Սրաշեն հատվածում նույնպես խնդիր կա. «Ադրբեջանական զինված ուժերը, չհանդիպելով թե՛ դիվանագիտական, թե՛ այլ որևէ  դիմադրության՝ քայլելով գալիս են առաջ, և ենթադրաբար կկորցնենք նաև Շիկահողի դիմացի բարձունքը, որն անմիջապես առնչվում է արդեն գյուղի հետ»:

ԱԺ Պաշտպանության և անվտանգային հարցերի մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Անդրանիկ Քոչարյանը  Factor.am-ի հետ զրույցում նշեց, որ եթե Վահե Հակոբյանն այդպիսի տեղեկատվություն ունի, ճիշտ կլինի, որ դիմի համապատասխան կառույցներին: «Փաստորեն նա տիրապետում է շատ կարևոր հետախուզական տեղեկատվության և եթե միայն ինքն է տիրապետում, պետական լիազոր մարմինները չեն տիրապետում այդ տեղեկատվությանը, այստեղ մտածելու բան կա… Իհարկե, Վահե Հակոբյանը, հանձինս այն ուղղաթիռների, որոնցով ինքը նախկինում շրջագայել է, ունեցել է համապատասխան տեխնիկական հնարավորություններ՝ այդպիսի տեղեկատվություն ստանալու համար… Այդպիսի տեղեկությունը տարածելը ձեռնտու է միայն Ադրբեջանին»:

ԱՆդրանիկ Քոչարյանն ընդգծեց, որ համապատասխան մարմինները պետք է Վահե Հակոբյանից բացատրություն պահանջեն, թե որտեղից իրեն այդպիսի տեղեկությունը, կամ եթե ապատեղեկատվություն է, ապա այն տարածելով՝ ինչ խնդիր է լուծում Վահե Հակոբյանը:

Անդրանիկ Քոչարյանը նշեց նաև, որ Գլխավոր շտաբի պետի հետ քիչ առաջ է խոսել, և նա հաստատել է պաշտոնական տեղեկատվությունը, ըստ որի Փելա սար կոչվող տարածքում դիրքային փոփոխություն տեղի չի ունեցել:

Անդրադառնալով հարցին, թե արդյոք երեկ Հայաստան վերադարձած գերիների դիմաց Հայաստանը քարտեզներ է տրամադրել Ադրբեջանին, Քոչարյանը պատասխաեց. «Տեղյակ չեմ քարտեզների մասին, բայց հինգ գերիների վերադարձը  կոնկրետ աշախատանքի արդյունք է և այդ աշխատանքով զբաղվող համակարգեր կան»:

Հարցին, թե ովքեր են աշխատանք տանում, այն դեպքում, երբ ռուսական մամուլը գրում է այդ առնչությամբ Մուրադովի գործունեության մասին, և կարծես թե Հայաստանի իշխանությունները գործընթացի մասնակից չեն, Քոչարյանը պատասխանեց. «Դա Հայաստանի ոչ թե իշխանության, այլ հայտնի շրջանակների կողմից ձևավորվող տեսակետ է, որ իբրև թե Հայաստանը ոչինչ չի անում, օտարներն ամեն ինչ անում են մեր փոխարեն, մենք անպաշտպան ենք, ուրիշներն են մեր դարդերով զբաղվում, բայց այդպես չէ, Հայաստանն ունի ձևավորված քաղաքական իշխանություն, համապատասխան մարմիններ, որոնք ի պաշտոնե զբաղվում են այս հարցերով: Նաև մեր եկեղեցին, Սփյուռքն են ինչ-որ բանով նպաստում այս խնդրի լուծմանը: Առանց Հայաստանի Մուրադովը ինչպե՞ս կարող է որևէ բան անել: Առանց իշխանության, նման խնդիրները չեն լուծվում: Իսկ իշխանությունը իր առջև դրված խնդիրները լուծում է առանց թմբկահարելու»:

Մանրամասերը՝ տեսանյութում: