Նույն անձի ցուցմունքով ինձ կալանավորեցին, իսկ Դավիթ Սանասարյանին ու Արմեն Մարտիրոսյանին ազատ արձակեցին․ Անդրիաս Ղուկասյան

Այսօր կայացավ «Սասնա ծռեր» զինված խմբին օժանդակելու համար մեղադրվող «Ոտքի՛ Հայաստան» քաղաքացիական նախաձեռնության համակարգող Անդրիաս Ղուկասյանի գործով հերթական դատական նիստը։ Նիստի ընթացքում երկու միջնորդություն ներկայացվեցին, երկուսն էլ, սակայն մերժվեցին։

Ղուկասյանի պաշտպան՝ Կարեն Մեժլումյանն ինքնաբացարկի միջնորդություն ներկայացրեց դատավոր Վարդան Գրիգորյանին՝ նշելով, որ նա կողմնակալ է։ Մյուս միջնորդությունն ուղղված էր մեղադրող Պետրոս Պետրոսյանին, պաշտպանական կողմը պնդում էր, որ նա ևս խտրական վերաբերմունքի է արժանացնում Ղուկասյանին։

Այսօրվա նիստին հայտարարությամբ հանդես եկավ Անդրիաս Ղուկասյանը՝ նշելով, որ իր, Դավիթ Սանասարյանի և Արմեն Մարտիրոսյանի դեմ նույն անձը կեղծ ցուցմունք է տվել, վերջիններս, սակայն ազատ են արձակել: «Ինձ կալանավորել եք, ըստ իս՝ Էդգար Պապիկյանի սուտ ցուցմունքների հիման վրա: Նա սուտ ցուցմունք է տվել իմ, Դավիթ Սանասարյանի և Արմեն Մարտիրոսյանի դեմ, մեղադրողն այդ ցուցմունքը հիմնավոր չի համարում, որպեսզի Արմեն Մարտիրոսյանին և Դավիթ Սանասարյանին մեղադրական եզրակացություն ներկայացնի: Դատարանը համարել է, որ դրանք բավարար միջոցներ չեն, որպեսզի Արմեն Մարտիրոսյանն ու Դավիթ Սանասարյանը գտնվեն անազատության մեջ և որևէ խնդիր չի տեսել նրանց գրավով ազատելու համար, իսկ ինձ պահում է կալանքի տակ»,- ասաց Անդրիաս Ղուկասյանը՝ անհեթեթ որակելով մեղադրողի պնդումը, թե ինքը հանրային կյանքում վտանգ կարող է ներկայացնել։

Ղուկասյանի պաշտպան Կարեն Մեժլումյանը Factor.am-ի հետ զրույցում նշեց, որ որ այդ գործը «մահակի պես» կախված է Սանասարյանի և Արմեն Մարտիրոսյանի գլխին․ «Նրանց նկատմամբ էլ մինչ օրս գործը կարճված չէ, մահակի պես նրանց գլխի վրա են պահում այդ գործը, ու նրանք այդ ռիսկի տակ են»։

Փաստաբանը չգիտի, թե ինչով է պայմանավորված այն, որ Սանասարյանին ու Մարտիրոսյանին գրավի դիմաց ազատել են, իսկ Ղուկասյանին մերժել, բայց գիտի մեկ բան, որ Ղուկասյանին շարունակում են կալանքի տակ պահել քաղաքական դրդապատճառներով․ «Առաջին իսկ օրից պարզ էր, որ քաղաքական հետապնդում են իրականացնում նրա նկատմամբ»։

Լիլիթ Շաբոյան