Քաղաքականություն
18.10.2021 | 23:20
Թուրքիա փախչող աֆղան փախստականները ֆիզիկական բռնության են ենթարկվել ու հետ ուղարկվել Իրան, որտեղ նրանց սպառնում է վերադարձ Աֆղանստան։ Այս մասին գրում է «Ահվալ» գործակալությունը՝ վկայակոչելով Human Rights Watch միջազգային իրավապաշտպան կազմակերպության զեկույցը։
Կազմակերպության ներկայացուցչի հետ զրույցում Իրանից Թուրքիա անցած մի քանի փախստականներ պատմել են թուրք զինծառայողների կողմից իրականացված բռնությունների մասին։ Նրանք պատմել են ծեծի, ունեցվածքը խլելու, կալանքի տակ գտնվելու ժամանակ սննդի կամ բժշկական օգնության տրամադրման մերժման մասին։
Այս դեպքերի մեծ մասը տեղի են ունեցել Թուրքիայի և Իրանի՝ 534 կմ երկարությամբ սահմանին։
HRW-ը կոչ է անում միջազգային կազմակերպություններին, այդ թվում՝ ՄԱԿ-ին և ԵՄ-ին, ճնշում գործադրել Թուրքիայի վրա՝ վերջ տալու փախստականներին հետ ուղարկելու պրակտիկան։ Կազմակերպությունը պնդում է, որ փախստականները միջազգային մարդասիրական իրավունքով հումանիտար վերաբերմունքի և ապաստանի իրավունք։ Թուրքիան, սակայն, չի վավերացրել այդ միջազգային կոնվենցիաները, ներառյալ՝ 1951թվականի Փախստականների մասին Ժնևի կոնվենցիան։
Ներկայում Թուրքիայում փախստականների դեմ մեծ ալիք կա։ Այդ երկրում այժմ 4 մլն սիրիացի և շուրջ 100․000 աֆղան փախստական կա։ Աֆղանստանից փախստականների թիվը, սակայն, հստակ չէ։
Միաժամանակ, ԵՄ-ն շարունակում է փախստականների գործարքը Թուրքիայի հետ և ֆինանսական օգնություն է տրամադրում Անկարային։ HRW-ն իր հերթին կոչ է անում ԵՄ-ին՝ վերանայել Թուրքիային փախստականների համար երրորդ անվտանգ ուղղության սահմանումը, քանի որ նրանք ենթարկվում են բռնությունների, ինչպես նաև իրավական սահմանափակ պաշտպանություն ունեն։
Էմմա Չոբանյան
