07.04.2026 | 13:00
Նիկոլ Փաշինյանի անունո՞վ չեք ընտրություններին մասնակցում․ պայքարում եք երևույթի դեմ, որով եկել եք․ ՏԵՍԱՆՅՈՒԹ
Սյունիքի մարզի Փելա սարի մի հատվածն անցել է ադրբեջանական վերահսկողության տա՞կ․ Կապանի համայնքապետը պնդում է, մարզպետը՝ հերքում
Քաղաքականություն
18.10.2021 | 14:17
Սյունիքի մարզի Կապան քաղաքի Փելա սարի «Լկատր» կոչվող բարձունքն ամբողջովին անցել է Ադրբեջանի վերահսկողության տակ։ Այս մասին Factor.am-ին տեղեկացրեց Կապանի համայնքապետ Գևորգ Փարսյանը։ Նրա խոսքով՝ երկու օր առաջ ռուս սահմանապահներն իջեցվել են այդ դիրքից:
«Մեզ համար սարի այդ ճանապարհը միջդիրքային ուղի էր ծառայում, գյուղացիներն օգտագործում էին անտառ գնալու և վառելափայտ գտնելու նպատակով։ Տարիներ առաջ այդտեղ ՀՕՊ զորամաս է եղել, հետո ժամանակի ընթացքում այդ ճանապարհահատվածը սկսեցինք օգտագործել և՛ մենք, և՛ ադրբեջանական կողմը։ Հիմա լրիվ իրենցն է, փակել են մեզ համար»,- նշեց համայնքապետը։ Թե երբ ու ում միջև է այսպիսի պայմանավորվածություն ձեռք բերվել, Փարսյանն ասաց, որ տեղյակ չէ։
Փորձեցինք պարզաբանում ստանալ նաև Սյունիքի մարզպետ Մելիքսեթ Պողոսյանից։ Նա ասաց․ «Նման բան չկա, սուտ բաներ են», սակայն այլ հավելյալ տեղեկություններ չհայտնեց։ Մեր ճշտող հարցին՝ իսկ տեղեկությունը փորձե՞լ են հստակեցնել, մարզպետը բացասական պատասխան տվեց։
Ռոզա Վարդանյան
