01.01.2026 | 21:57
Ձյուն, բուք, մառախուղ. իրավիճակը ճանապարհներին
Փլուզում Բաթումի քաղաքում. ոչ պաշտոնական տվյալներով՝ մահացել է 2 մարդ, փլատակների տակ է հայտնվել 15-ից ավել քաղաքացի
Քաղաքականություն
09.10.2021 | 09:46
Վրաստանի Բաթումի քաղաքում երեկ առավոտյան փլուզվել է բնակելի հինգհարկանի շենքի մեկ մուտքը: Ըստ ոչ պաշտոնական տեղեկության՝ այս պահին երկու մարմին է հաջողվել դուրս բերել փլատակների տակից։
Ինչպես Factor.am-ի թղթակցի հետ զրույցում հայտնեցին Բաթումիի հիվանդանոցից՝ մինչ այդ ծանր վնասվածքներով դուրս բերված և հիվանդանոց տեղափոխված կինը ստացված վնասվածքներից մահացել է։
«Չորս հոգու փրկարարները ևս հայտնաբերեցին՝ նրանք ողջ են և տեղափոխվել են հիվանդանոց: Այժմ փրկարարները բարձրացնում են առաստաղը՝ մյուս մարդկանց հասնելու համար», – ասել է Վրաստանի ներքին գործերի նախարար Վախթանգ Գոմելաուրը:
Հայտնաբերված տուժած քաղաքացիները տեղափոխվել են տարբեր հիվանդանոցներ։ Նրանցից մեկը՝ Ինգա Դավլաձեն, ունի բազմաթիվ վնասվածքներ, այդ թվում՝ ազդրի, սրունքի կոտրվածք, ներքին օրգանների կոնտուզիա: Տուժողի մոտ արձանագրվել է սրտի կանգ, սակայն բժիշկներին հաջողվել է նրա կյանքը փրկել: Դավլաձեի վիճակը, սակայն, գնահատվում է ծայրահեղ ծանր:
Ծանր վիճակում է նաև 37 -ամյա Թավդգիրիձեն: Նրա ոտքը կոտրված է, որովայնի հատվածում ևս ունի
վնասվածք: Այնուամենայնիվ, նա գիտակից է և կյանքին վտանգ չի սպառնում:
Ըստ նախարար Գոմելաուրի՝ շենքի փլուզման հետևանքով փլատակների տակ է մոտ 10-15 մարդ, որոնցից երկուսի հետ հաջողվել է հեռախոսային կապ հաստատել:
Աջարիայի կառավարության ղեկավար Թորնիկե Ռիժվաձեն հայտարարել է, որ Բաթումում փրկարարական աշխատանքները շարունակվել են ամբողջ գիշեր:
«Փրկարարական գործողությունները կշարունակվեն այնքան ժամանակ, քանի դեռ վերջին անձը դուրս չի բերվել փլատակների տակից», – նշել է նա։
Փլատակների տակ հայտնված մարդիկ պարբերաբար ձայներ են արձակում: Որոնողական աշխատանքները դժվար են ընթանում: Որոնվողների մեջ է նաև մեկուկես տարեկան մեկ երեխա։
Հավելենք, որ այս պահին փլուզման մի քանի վարկած է շրջանառվում՝ գազի պայթյուն, խարխուլ հիմք, ինչպես նաև չնախատեսված երկու հարկի կառուցում։
Ազնիվ Սիրադեղյան
