19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Չպատվաստված քաղաքացիների համար կորոնավիրուսի բուժումը կարող է դառնալ վճարովի
07.10.2021 | 17:46
«Ես նկատում եմ, որ մարդիկ կան, որոնք շարժում են սկսել կորոնավիրուսի բուժումը վճարովի դարձնելու համար։ Ասում են՝ ինչի պետք է մենք վճարենք հարկեր, որ մարդիկ չպատվաստվեն և գնան անվճար բուժվեն։ Եվ ես կանխատեսում եմ, որ այդ մարդկանց ձայնն ավելի բարձր է հնչելու»,- կառավարության այսօրվա նիստում հայտարարեց վարչապետ Նիկոլ Փաշինյանը։
Կառավարությունում Factor.am-ի աղբյուրը հայտնում է, որ նիստից հետո Փաշինյանը փակ խորհրդակցություն է անցկացրել կառավարության անդամների հետ։ Քննարկվել և, ըստ այդմ, նախնական որոշում են կայացրել, որ դեկտեմբերի 1-ից չպատվաստված քաղաքացիների համար կորոնավիրուսի ստացիոնար բուժումը կարող է դառնալ վճարովի: Մեկ պացիենտի ստացիոնար բուժումը կորոնավիրուսային հիվանդության բարդացումներից, ըստ մեր աղբյուրի, կազմում է նվազագույնը 700․000 ՀՀ դրամ։
Հիշեցնենք, որ Նիկոլ Փաշինյանը Կառավարության այսօրվա նիստում, դիմելով առողջապահության նախարարին, կառավարության անդամներին ու իրավապահ մարմիններին, խիստ հրահանգներ տվեց՝ անդրադառնալով որոշ շրջանակների կողմից հակապատվաստումային քարոզչություն անելուն:
«Գնացեք լուծե՛ք, ոչ մեկ չի կարող մեզ խանգարել գործել, խնդիր եմ դրել, գնացեք լուծե՛ք, շատ վատ է պատվաստման թվերը ու որևէ ուրիշ մեկից չբողոքեք: Վերաբերում է դահլիճում նստած բոլորին, որ գալիս ասում եք՝ էս ինչ աշխատողը վախենում է պատվաստվի։ Պետական կառավարման համակարգում մարդ չպետք է լինի, որը պատվաստված չլինի։ Անձամբ բոլոր առաջին դեմքերը պատասխանատվություն են կրում դրա համար: Հերիք է նստենք բողոքենք, էլ տենց բաներ չլսեմ»,- հանձնարարեց վարչապետը:
Արփի Հակոբյան
