Քաղաքական անշնորհքություն է ընտրություններից կարճ ժամանակ անց իշխանափոխություն պահանջելը. Աղազարյան. ՏԵՍԱՆՅՈՒԹ

«Համաձայն չեմ այդ ձևակերպման հետ: Արցախի մեր հայրենակիցների պայքարը՝ ինքնորոշման սկզբունքի հիման վրա, մտել է նոր փուլ: Այսօր աշխարհում և մեր տարածաշրջանում ստեղծվել է իրավիճակ, որ մեզ հնարավորություն է տալիս լուծել  այն խնդիրները, որ հետապնդել ենք տարիներ ի վեր: Կորուստներ ունենք, և այդ կորուստների վերականգնմամբ ենք զբաղված: Այնպես որ այդ տերմինները անընդունելի են»,- Factot.am-ի հետ զրույցում նշեց «Քաղաքացիական պայմանագիր» խմբակցության պատգամավոր Հովիկ Աղազարյանը՝ անդրադառնալով դիտարկմանը, որ օրերս Ռոբերտ Քոչարյանն ասուլիսում հայտարարել է, թե Հայաստանի ղեկավարը բանակցային գործընթացում ոչ թե սուբյեկտ է, այլ վերածվել է օբյեկտի, և որ ծնկած վիճակում հարմար չէ բանակցել:

«Կան բաներ, որոնց մասին չես կարող հայտնել հրապարակավ, բայց դրանք չտեսնելու համար պետք է  քաղաքականապես կույր լինել: Չեմ կարծում, թե Ռ. Քոչարյանը կամ Ս. Սարգսյանը քաղաքականապես կույր են, նրանք լավ էլ տեսնում են, բայց շահարկում են իրավիճակը, որ մենք չենք կարող այս պահին իրենց խոսքին համարժեք հակադարձել», նշեց պատգամավորը:

Անդրադառնալով իշխանափոխության համար պայքարի նոր փուլի, այդ թվում նաև փողոցային պայքարի վերսկսման մասին ընդդիմության հայտարարություններին և ակտիվությանը ՝ Աղազարյանն ընդգծեց. «Քաղաքական անշնորհքություն է ընտրություններից կարճ ժամանակ անց իշխանափոխություն պահանջելը»:  Նա նաև հավելեց, որ գոնե 100 օր պետք է «ձենները կտրեին, բայց ընտրություններից գրեթե մեկ ամիս հետո սկսեցին իրենց գործողությունները, քանի որ իրենց չարագույժ կարծիքներն իրականություն չդարձան»:

Մանրամասները՝ տեսանյութում: