31.03.2026 | 23:28
Իրանը հերքում է Թուրքիայի ուղղությամբ հրթիռային հարձակումը և կրկին համատեղ հետաքննություն առաջարկում
Ոստիկանությունը բերման է ենթարկում բարձրախոս օգտագործելու համար. Քրիստինե Վարդանյան. ՏԵՍԱՆՅՈՒԹ
Քաղաքականություն
07.10.2021 | 15:51
Ես այստեղ էի եկել միայն նրա համար, որովհետև ոստիկանությունը զգուշացրել էր, որ բարձրախոս օգտագործելու համար բերման են ենթարկելու ակցիայի մասնակիցներին: Այս մասին, այսօր՝ հոկտեմբերի 7-ին, կառավարության շենքի դիմաց ՀՅԴ երիտասարդների բողոքի ակցիայի ժամանակ լրագրողների հետ զրույցում նշեց ԱԺ «Հայաստան» խմբակցության պատգամավոր, ՀՅԴ-ական Քրիստինե Վարդանյանը:
«Ինքներս գիտեք, որ նման կարգավորում չկա: Եկել էի հույս ունենալով, որ այստեղ մարդկանց ներկայությունը կստիպի ոստիկանությանը զերծ մնալ անօրինական գործողություններ իրականացնելուց: Արդեն մի քանի հոգու բերման են ենթարկել. Մեկին ռուպռ ունենալու համար, մյուսին հենց այնպես լրագրողներին հարցազրույց տալու համար: Հիմա իմ ձեռքին ռուպռ չկա, բայց եթե Հայաստանում մարդկանց բերման են ենթարկում ռուպռով խոսելու համար, ոստիկանությունը պետք է համարի, որ ես հիմա ռուպռով եմ խոսում: Եթե իմ ընկերներին բերման են ենթարկում հողատու և դավաճան ասելու համար, ես կրկնում եմ այդ բառերը:
Եթե մարդուն բերման եք ենթարկում հարցազրույց տալու համար, ես հիմա հարցազրույց եմ տալիս: Ո՞նց եք որոշում՝ ում եք բերման ենթարկում: Ինչո՞ւ ինձ բերման չեք ենթարկում: Ձեզ զանգում են, ասում են՝ էս մարդուն բերման ենթարկե՞ք:
Ինչի՞ց էինք մենք ուզում ազատվել, երբ համատարած փողոցներ էինք փակում: Եվ կարողացա՞նք ազատվել, թե՞ ավելի վատ վիճակում հայտնվեցինք: Դուք երբևէ տեսե՞լ եք, որ մարդում ռուպռով խոսելու համար բերման ենթարկեն»,-ասաց նա:
Պատգամավորը նկատեց, որ ակցիային ընդամենը 10-15 երիտասարդներ էին մասնակցում. «Հայաստանում կա վարվող քաղաքականության դիմադրություն և այդ դիմադրության սերմերը պետք է փայփայել, մեծացնել և ցույց տալ, որ այս քաղաքականությունը Հայաստանում չի հաջողելու»:
Նշենք, որ նախքան երիտասարդներից մի քանիսին բերման ենթարկելը, ակցիայի մասնակիցներից մեկը բարձրախոսով նշեց, որ իրենք հավաքվել են իրենց բողոքը հայտնելու Նիկոլ Փաշինյանի այն հայտարարության վերաբերյալ, ըստ որի՝ վերջին 30 տարում Շուշիում ոչինչ չի կառուցվել: Ոստիկանները բերման ենթարկեցին ոչ միայն բարձրախոսով խոսողին, այլ նաև լրագրողներին հարցազրույց տվող ՀՅԴ-ական երիտասարդին:
Մանրամասները՝ տեսանյութում:
