12.12.2024 | 20:28
Փոխվարչապետ Մհեր Գրիգորյանը մասնակցել է ԱՊՀ պետությունների կառավարությունների ղեկավարների նիստին
Էրդողանի կուսակիցը հերքում է Թուրքիայի նախագահի հիվանդության մասին պնդումները
Քաղաքականություն
06.10.2021 | 23:34
Թուրքիայի իշխող «Արդարություն և զարգացում» կուսակցության փոխնախագահ Նուման Քուրթուլմուշը հերքել է փորձագետ Սթիվեն Քուքի պնդումները, թե երկրի նախագահ Ռեջեփ Թայիփ Էրդողանը չափազանց հիվանդ է՝ երկրի կառավարությունը շարունակելու համար։ Այս մասին գրում է «Duvar»-ը։
Ավելի վաղ Քուքը հրապարակում էր արել, որ նախագահ Էրդողանի առողջությունը կտրուկ վատանում է՝ մեջբերելով մի շարք տեսանյութեր, որտեղ երևում է, որ Թուրքիայի նախագահը դժվարությամբ է քայլում, հազիվ խոսում։ Քուքը նաև նշել է, թե Էրդողանի վիճակն այնքան վատ է, որ հանրային ելույթներից առաջ ուժեղ ցավազրկողներ պետք է ընդունի։ Ըստ փորձագետի՝ Էրդողանը չի կարողանա մասնակցել 2023 թվականի նախագահական ընտրություններին և, ամենայն հավանակությամբ, նրան կփոխարինի պաշտպանության նախարար Հուլուսի Աքարը։
Քուրթուլմուշը հակադարձել է այս պնդումներին՝ նշելով, որ 2023 թվականի ընտրությունները վճռորոշ են Թուրքիայի ապագայի համար և որոշ խաղացողներ ցանկանում են, որ «Թուրքիան լինի անկառավարելի պետություն այդ գործընթացում»։
«Որոշներն ուզում են, որ Թուրքիան հետ գնա, հին քննարկումները բորբոքվեն։ Մենք այնպիսի շրջանում ենք, երբ դրսում պատվիրված հոդվածներ են հրապարակվում»,- ասել է Քուրթուլմուշը։
Նա նշել է, որ ո՛չ ներքին, ո՛չ էլ միջազգային մանդատ չի կարող որոշել, թե ով է երկիրը կառավարելու և հավելել, որ իրենց «ամենամեծ ձեռքբերումն այն է, որ երբեք չեն շեղվում ժողովրդավարության ուղղությունից»։
Էմմա Չոբանյան
