Հասարակություն
06.10.2021 | 22:40
Գորշ արջն իր երկու քոթոթներով շրջել է գրեթե ամբողջ Շիրակի մարզով ու գյուղերում վնասել մեղվի փեթակները։ Արջերից մեկին նկատել են «Արփի լիճ» ազգային պարկի Ախուրյանի կիրճ տեղամասում՝ Աշոցքի Կրասար գյուղի անտառում։ Factor.am-ի հետ զրույցում այս մասին ասաց «Արփի լիճ» ազգային պարկ ՊՈԱԿ-ի տնօրեն Մուշեղ Մուրադյանը։
«Արջերից մեկը 15-20 օր առաջ հայտնվել էր մեր Ալվար-Արտենիս տեղամասում, հետո իջել էր Ամասիա, մեղվի երկու փեթակ էր վնասել, հետո մտել էր Արեգնադեմ գյուղ, այնտեղ ևս մեղվի փեթակ էր վնասել։ Դրանից հետո նրան տեսել էին Մեղրաշատի հատվածում՝ սարի մասում։ Երեկ փոքր Սեպասարում է եղել, իսկ գիշերը՝ Մեծ Սեպասարում, մեղվի յոթ փեթակ է շրջել ու շատ հետաքրքիր վարքագիծ դրսևորել։ Խելացի կենդանի է, մեղվի փեթակներից առանձնացրել ու կերել է լավ որակի մեղրը»,- ասաց Մուշեղ Մուրադյանը։
Նա մեծ ոգևորություն հայտնեց, որ արջեր են հայտնվել իրենց մոտ։ Ասում է՝ սա նշանակում է, որ տարածքը խաղաղ է, ապահով միջավայր է կենդանու համար։
«Դուրը եկել է, շրջում է մեր պարկի անտառի հատվածում։ Շատ ողջունելի է, սա նաև նշանակում է՝ կենսաբազմազանության որակն է լավացել, սանիտարական մաքրումներ ենք կատարում, բուսականությունը թարմանում է։ Մեր տարածքը հատուկ պահպանվող է, արջերն էլ վայրի բնության կենդանիներ են»,- հավելեց նա։
Մուշեղ Մուրադյանն ասաց՝ չի կարծում, որ համայնքների բնակիչներին արջերը վնաս կտան։
«Երևի ձմեռը չմնան, հաստատ մի բանից նեղված են եղել, որ թողել, հասել են մեզ մոտ։ Իմ պատկերացմամբ՝ արջը տեղափոխվել է Լոռուց։ Մի ամիս առաջ Սալուտ գյուղում էին մեղվի փեթակներ շրջել։ Գորշ արջ է, կարծում եմ՝ երկու տարեկան կլինի որձը, իմ պատկերացմամբ՝ մոտ 150 կիլոգրամ քաշ ունի»,- նշեց նա։
Արմիկ Մովսիսյան
