Կորոնավիրուսի ախտանշանները սկսել են նմանվել գրիպի ախտանշաններին․ հիվանդությունը դարձել է ավելի արագընթաց

Կորոնավիրուսի ախտանշաններն այս աշնանը զգալիորեն տարբերվում են COVID-19-ի նախորդ ալիքներից, հիվանդության սկզբում այն հեշտությամբ կարելի է շփոթել մրսածության կամ գրիպի հետ։ Արդյունքում նոր ախտանշաններ են ի հայտ գալիս, իսկ հիվանդությունը դառնում է ավելի արագընթաց, գրում է Gazeta-ն։

Այսպես, փորձագետները կորոնավիրուսային վարակի նոր ախտանշան են անվանում մրսածությունը, որը շատ արագ է զարգանում․ թոքաբորբն առաջանում է արդեն 3-րդ օրը, այլ ոչ թե 7-րդ օրը, ինչպես նախկինում։

Հիվանդության առաջին օրերին կորոնավիրուսով հիվանդացածների մոտ նկատվում են սուր գրիպի նմանվող ախտանշաններ, կոկորդի ցավ, բարձր ջերմություն։ Սրան կարող են գումարվել գլխապտույտով խլությունն ու հոտառության կորուստը։ Երկու ախտանշաններն էլ խոսում են վիրուսի կողմից կենտրոնական նյարդային համակարգի խոցման մասին, նշել են բժիշկները։

«Քթից հոսք, կոկորդի ցավ, քրտնարտադրություն։ Արագ զարգացող ու երկարատև հազ՝ մեծ քանակությամբ խորխով։ Տենդն իրեն պահում է գրիպի պես, բայց տևում է ավելի երկար։ Զգալիորեն արտահայտվում են նյարդաբանական ախտանշանները՝ գլխապտույտ, գլխացավ, արտահայտված թուլություն։ Տեղից կտրուկ բարձրանալու փորձի ժամանակ հնարավոր է ուշաթափություն, գրանցվում է կենտրոնական նյարդային համակարգի վնասում։ Այս բոլոր ախտանշանները միանգամից չեն հայտնվում, առավելագույնը՝ երկրորդ օրը, և շարունակվում են շաբաթներով»,-պարզաբանել է բժիշկ Ալեքսանդր Էդիգերը։

Նախկին ախտանշաններից մնացել է միայն մարսողության խանգարումը, սակայն դա այժմ ավելի վառ է արտահայտված՝ փորացավով և փորլուծությամբ։

«Շատ դժվար է մարսվում ուտելիքը, անգամ ապուրներն ու շիլաները։ Հնարավոր է սրտխառնոց և փսխում։ Զննությունները ցույց են տալիս լյարդի արտահայտված ֆերմենտներ, որոնք նախկինում չէին նկատվում»,- հավելել է Էդիգերը:

Նախորդ ալիքներում կորոնավիրուսի հիմնական ախտանշաններն էին ջերմությունը, հոգնածությունը, հազը՝ փոքր քանակությամբ խորխով։ Հիվանդության զարգացման հետ մեկտեղ՝ որոշ հիվանդների մոտ հայտնվում են այնպիսի ախտանշաններ, ինչպես, օրինակ, օդի պակասի զգացողությունը։ Մարմնի ջերմության բարձրացում գրանցվել է հիվանդների 90%-ի մոտ, չոր հազը՝ 80%-ի, կրծքավանդակի հատվածում ծանրությունը՝ ավելի քան 20%-ի մոտ։

Տաթև Ֆռանգյան