27.03.2025 | 22:29
ՀՀ ԱԳ փոխնախարարն ու ԵԱՀԿ գլխավոր քարտուղարը քննարկվել են փոխգործակցությանը վերաբերող հարցեր
Զենքի գործով ես հարցաքննվել եմ ԱԱԾ-ում. Սեյրան Օհանյանը մանրամասներ է հայտնում. ՏԵՍԱՆՅՈՒԹ
Քաղաքականություն
30.09.2021 | 14:38
ԱԱԾ-ն հայտնել է, որ առանձնապես խոշոր չափերի հափշտակություն կատարելու կասկածանքով ձերբակալվել են պաշտպանության նախկին նախարար Դավիթ Տոնոյանն ու զենք մատակարարող ընկերության տնօրեն Դավիթ Գալստյանը (Պատրոն Դավո):
Պաշտպանության նախկին նախարար, «Հայաստան» խմբակցության պատգամավոր Սեյրան Օհանյանը թեմայի շուրջ զրույցում նշեց, որ զենքի գործով ինքն էլ է հարցաքննվել որպես վկա:
«Հաշվի առնելով նախաքննության գաղտնիությունն ու անմեղության կանխավարկածը, ես չեմ կարող ամբողջությամբ ներկայացնել այն տեղեկությունները, որոնց տիրապետում եմ, բայց կարող եմ ուղղում մտցնել: Երբ ասվեց, որ 2011թ-ին ի պահ վերցրված զինամթերքը գնվել է և խոշոր չափի վնաս է հասցվել ՊՆ-ին, չասվեց, թե երբ է այդ զինամթերքն ընդունվել: Եվ որոշ անձինք նաև թիրախավորել են ինձ, կեղծ մատնության շրջանակներում, և այս ամենը դրա արդարացման բեմադրական տեսարանն է: Ես գտնում եմ, որ եթե նույնիսկ կա քրեական գործ և մարդիկ պետք է ձերբակալվեն, ՊՆ թե՛ նախկին, թե՛ ներկա ղեկավարներից ու զինվորականներից ոչ մեկը չի խուսափել և չի խուսափում, եթե նրանց հրավիրում են քննչական գործողություններ իրականացնելու: Այս տեսարանը կեղծ մատնությունն արդարացնելու համար է:
Իսկ իրականում ինչ է եղել. 2011-ին մատակարարող ընկերությունը ՊՆ-ին մատակարարել է ավիացիոն ռազմամթերք՝ որոշ քանակությամբ, որի 30 տոկոսը ԳՇ համապատասխան մասնագետների ստուգմամբ հանձնաժողովով ընդունվել է և ՊՆ բյուջետային վարչությունը վճարել է դրա դիմաց: Խմբաքանակի 70 տոկոսը, քանի որ անսարք, ոչ պիտանի է եղել, նախարարությունը չի ընդունել և չի վճարել դրա համար: Բայց այդ խմբաքանակը վերցրվել է ի պահ ՊՆ-ում՝ մատակարարող կազմակերպության խնդրանքով, այն պայմանով, որ թույլտվություն ձեռք կբերեն տարանցիկ փոխադրմամբ՝ տանել այլ երկրներ: Որքան տեղյակ եմ՝ 2018-2019թթ. այդ խմբաքանակն ընդունվել է: Թե ով, ինչպես, ինչ քանակությամբ և ինչ գնով, այս բոլոր հարցերը պետք է ուղղեն ԱԱԾ-ին, որը համապատասխան գործողություն է իրականացնում, և համապատասխան գերատեսչության մարմիններին:
ԱԱԾ հայտարարության մեջ մի փոքր ազնվություն չեմ տեսնում, նրանք պետք է հայտարարեն, որ 2011թ. ի պահ վերցրված ռազմամթերքը գնվել է 2018-19թթ-ին: Կարծում եմ՝ այս տեսարաններն այս կամ այն մարդկանց վրա բարդելու կամ ինչ-որ կարևոր միջոցառումից շեղելու համար են»,- մանրամասնեց Օհանյանը:
Մանրամասները՝ տեսանյութում:
