29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
Փաստացի խոչընդոտ չկա․ Էրդողանի խորհրդականը հայտարարել է, որ դրական են վերաբերվում Հայաստանի հետ հարաբերությունների կարգավորմանը
Քաղաքականություն
29.09.2021 | 13:16
Հայաստանի հետ հարաբերությունների թեմային հիմա էլ անդրադարձել է Թուրքիայի նախագահի գլխավոր խորհրդական, խոսնակ Իբրահիմ Քալընը՝ հայտարարելով, որ Անկարան «դրական է վերաբերվում Հայաստանի հետ հարաբերությունների կարգավորմանը Լեռնային Ղարաբաղի պատերազմի ավարտից հետո»։ Այս մասին գրում է Duvar-ը։
«Սկզբունքորեն մենք դրական ենք վերաբերվում Հայաստանի հետ հարաբերությունների կարգավորմանը։ Երևանի հետ մեր դիվանագիտական հարաբերությունները դադարեցնելու և սահմանը փակելու հիմնական պատճառը 1992 թվականին Լեռնային Ղարաբաղ ներխուժումն էր։ Քանի որ այս խնդիրը լուծված է, փաստացի այլևս խոչընդոտ չկա մեր՝ Հայաստանի հետ հարաբերությունների կարգավորման համար։ Բայց դեռևս Լեռնային Ղարաբաղի հետ կապված լուծելու հարցեր կան»,- ասել է Քալընը Haber Global TV-ին տված հարցազրույցում։
Նա նշել է, որ հրադադարի մասին հայտարարությունը ստորագրվել է, խաղաղության համաձայնագիրը՝ դեռ ոչ։
«Պայմանները պետք է քննարկվեն, երկու կողմերը պետք է հավանություն տան։ Գործընթացը շարունակվում է։ Հայաստանը միայն Հայաստանից չէ բաղկացած, շատ տարրեր կան։ Բայց այս համաձայնագիրն ի շահ Հայաստանի կլինի»,- ասել է Քալընը։
Նա հավելել է, որ Թուրքիայի նախագահն արդեն դրական ազդակներ է ուղարկել՝ նշելով, թե Հայաստանի ու Ադրբեջանի միջև կապերի վերականգնումից կշահի նաև Թուրքիան, իսկ ամբողջ տարածաշրջանին դա խաղաղություն կբերի։
«Հայաստանի հետ հարաբերությունների կարգավորման հարցում մեր նախագահը նույնպես դրական հայտարարություն է արել։ Մինչդեռ մենք նաև տարածություն պիտի հաղթահարենք՝ լուծելով (Հայաստանի) խնդիրները Ադրբեջանի հետ։ Պայմանագիրը խաղաղություն կբերի ամբողջ տարածաշրջանին»,- ասել է Թուրքիայի նախագահի խորհրդականը։
Էմմա Չոբանյան
