Վրաստանի վարչապետը Բաքվում է․ նախատեսվում է համագործակցության մասին հուշագրերի ստորագրում

Վրաստանի վարչապետ Իրակլի Ղարիբաշվիլին մեկնել է Ադրբեջան։ Տեղական լրատվամիջոցների փոխանցմամբ՝ վրացականի կառավարական պատվիրակության ինքնաթիռն արդեն վայրէջք է կատարել Բաքվում։

Ղարիբաշվիլիի ղեկավարած պատվիրակության կազմում են փոխվարչապետ, ԱԳ նախարար Դավիթ Զալկալիանին, էկոնոմիկայի և կայուն զարգացման հարցերի նախարար Նաթիա Թուրնավան և կառավարության աշխատակազմի ղեկավար Իլյա Դարչիաշվիլին։

Իրակլի Ղարիբաշվիլին հանդիպում կունենա Ադրբեջանի նախագահ Իլհամ Ալիևի հետ։ Այցի ընթացքում կայանալու է նաև Ադրբեջանի ու Վրաստանի վարչապետների նախագահությամբ միջկառավարական տնտեսական հանձնաժողովի նիստը, որից հետո ստորագրվելու են համագործակցության մասին հուշագրեր։

Aliq.ge-ի փոխանցմամբ էլ՝ մինչ Բաքու մեկնելը «Իմեդի» հեռուստաալիքին տված հարցազրույցում Ղարիբաշվիլին նշել է, որ առաջիկայում կլինի նաև Երևանում:

«Մենք ունենք վստահություն, որն ամենակարևորն է․ երբ վստահություն լինի երկրների առաջնորդների միջև ևս, բոլոր հարցերը կլուծվեն: Նմանատիպ հարաբերություններ ունեմ նաև պարոն Փաշինյանի հետ, ով ընդամենը մի քանի շաբաթ առաջ էր Թբիլիսիում, և ես էլ առաջիկայում պատրաստվում եմ այցելել Հայաստան»,- ասել է Ղարիբաշվիլին:

Վրաստանի վարչապետը նշել է նաև, որ վերջին 30 տարվա ընթացքում առաջին անգամ Վրաստանը Ադրբեջանի և Հայաստանի միջև կարևոր միջնորդությամբ հանդես եկավ։ Դա 15 հայ գերիների վերադարձն էր՝ ականապատ տարածքների քարտեզի դիմաց: Վերջերս էլ Ղարիբաշվիլին առաջարկել էր հայ-ադրբեջանական բարձր մակարդակի շփումների հարթակ ստեղծել Թբիլիսիում։

Էմմա Չոբանյան