Նախընտրական Գյումրի․ թեկնածուների պաստառներից ամենաշատը «Բալասանյան դաշինք»-ինն է. ԼՈւՍԱՆԿԱՐՆԵՐ

Գյումրու տարբեր հատվածներում արդեն փակցվել են ՏԻՄ ընտրություններին մասնակցող մի քանի քաղաքական ուժերի և նրանց քաղաքապետի թեկնածուների նախընտրական պաստառները։ Ամենաշատ պաստառները «Բալասանյան դաշինք» կուսակցությանն են, որը, կուսակցությունից բացի, գովազդում է նաև քաղաքապետի իր թեկնածուին։

«Բալասանյան դաշինք»-ի ավագանու ընտրացուցակը գլխավորող Վարդգես Սամսոնյանի լուսանկարները փակցված են Գյումրու կենտրոնական փողոցների կանգառներում, Անի թաղամասում։

Ի դեպ, Անի թաղամասը, որը ծայրամասային է և այստեղ է գտնվում Շիրակի պետական համալսարանը, քաղաքական ուժերի առաջին դեմքերի նախընտրական պաստառների պակաս չկա․ այստեղ փակցված են թե՛ ՔՊ-ի թեկնածու Հովհաննես Հարությունյանի փոքր ու մեծ պաստառները, թե՛ ՀՀԿ թեկնածու Արտյոմ Ղուկասյանի, և թե՛ «Բալասանյան դաշինք»-ի թեկնածու Վարդգես Սամսոնյանի պաստառները։ Անի թաղամասում կա նաև ընտրություններին մասնակցող Կոմունիստական կուսակցության՝ «Հայրենիք, աշխատանք, սոցիալիզմ» խորագրով պաստառը։

Գյումրու կենտրոնական հատվածներն էլ, նախքան պաշտոնական քարոզարշավի մեկնարկը, արդեն հեղեղված էին «Գյումրին կռնա» դաշինքի պաստառներով։ Դատարանի շենքի մոտ «Զարթոնք» կուսակցության թեկնածու Վարդևան Հակոբյանի նախընտրական պաստառն է։

Հարցին՝ ինչպե՞ս են բաշխվել գովազդային վահանակների տեղերը, թիվ 31 տարածքային ընտրական հանձնաժողովի նախագահ Տիգրան Ղազարյանը պատասխանում է, որ պաստառների համար անվճար տեղեր են հատկացված, Կենտրոնական ընտրական հանձնաժողովն էլ վիճակահանությամբ բոլոր մասնակից ուժերին տեղեր է տրամադրել։

«Պարզ է, որ բոլորն ուզում են կենտրոնում, բոլոր տեղերը հավասարաչափ բաշխվել են, նաև ծայրամասերի տեղերը հավասարաչափ բաշխվել են բոլոր կուսակցությունների միջև։ Վճարովի պաստառները ԿԸՀ-ի կամ մեր տիրույթում չեն, այս դեպքում վերահսկվում է հիմնադրամների ծախսային մասը, դաշինքներն ու կուսակցությունները 60 միլիոնից ավելի չեն կարող ծախսել։ Եթե իրենց հնարավորությունները ներում են և կարող են իրենց թույլ տալ շատ տեղեր վերցնել, բոլորդ էլ գիտեք, որ գովազդային վահանակները վճարովի են և բարձր գներ են սահմանված, եթե 60 միլիոնի սահմանում կարող են, թող անեն»,- ասում է Տիգրան Ղազարյանը։

Գյումրու քաղաքապետարանի գովազդի և առևտրի սպասարկման ոլորտի համակարգման բաժնի պետի տեղակալ Մարտուն Սարուխանյանն էլ Factor.am-ի հետ զրույցում պարզաբանեց, որ գովազդային վահանակների տեղերը հանձնված են մասնավոր ընկերություններին, տվյալ պահին այն շահագործում է մեկ մասնավոր ընկերություն՝ «Էյ թի էլ իմիջ»-ը։

Քաղաքապետարանը մասնավոր ընկերություններին թույլտվություն է տրամադրում, իսկ նրանք հանձնում են շահագործման և ամսական տուրք վճարում քաղաքապետարանին։ Գյումրու բոլոր հատվածների համար գանձնվող տուրքը նույնն է՝ մեկ քառակուսի մետրի արժեքը՝ 1150 դրամ։ Կանգառները ևս մասնավոր են․ այստեղ ևս, ըստ Մարտուն Սարուխանյանի, նույնն գինն է սահմանված՝ 1150 դրամ։

Արմիկ Մովսիսյան