ԱՄՆ Ներկայացուցիչների պալատը քվեարկել է Ադրբեջանի ռազմական հանցագործությունների հետաքննության և հայ ռազմագերիների ազատ արձակման օգտին

ԱՄՆ Ներկայացուցիչների պալատն այսօր հզոր դիրքորոշում է գրավել Ադրբեջանի և Թուրքիայի՝ 2020 թվականին Արցախի և Հայաստանի վրա հարձակման դեմ՝ ձայների ճնշող մեծամասնությամբ ընդունելով Ամերիկայի Հայ Դատի հանձնախմբի (ANCA) կողմից հաստատված հինգ լրացումները, որոնք պահանջում են Բաքվից ազատ արձակել հայ ռազմագերիներին, կոչ են անում հետաքննել Ադրբեջանի կողմից իրականացված ռազմական հանցագործությունները, ԱՄՆ-ի կողմից աջակցություն ցուցաբերել Արցախին,  Թուրքիայի «Գորշ գայլեր» խմբավորումը ճանաչել որպես օտարերկրյա ահաբեկչական կազմակերպություն։ Այս մասին տեղեկացնում է ANCA-ն:

Այս օրինագծերն ընդունվել են որպես Ազգային պաշտպանության լիազորությունների մասին օրենքում (NDAA – H.R.4350) փոփոխությունների մաս: Սպասվում է, որ Սենատը հաջորդ ամսվա ընթացքում կքննարկի Ազգային պաշտպանության լիազորությունների մասին օրենքի իր տարբերակը։

«ԱՄՆ Ներկայացուցիչների պալատը, չնայած թուրքական և ադրբեջանական լոբբինգին, այսօր ձայների ճնշող մեծամասնությամբ, առանց որևէ օրենսդրի դեմ քվեարկության, կողմ է քվեարկել Անկարային և Բաքվին պատասխանատվության ենթարկելու օրենսդրական փոփոխություններին՝ անցյալ տարվա աշնանը Արցախի վրա կատարված հարձակումների և Հայաստանի դեմ շարունակվող ագրեսիայի համար»,- ասել է ANCA-ի գործադիր տնօրեն Արամ Համբարյանը:

Կոնգրեականներ Թոնի Քարդենասի, Ադամ Շիֆի և Բրեդ Շերմանի կողմից ներկայացված առաջին լրացումների համաձայն՝ «Ադրբեջանը պետք է անհապաղ ու առանց նախապայմանների հետ վերադարձնի բոլոր ռազմագերիներին ու կալանավորված քաղաքացիական անձանց»։

Տաթև Ֆռանգյան