Քաղաքականություն
23.09.2021 | 16:37«Անհասկանալի է, թե ինչ իրավակարգավորմամբ կամ ինչ պայմանավորվածության հիմնա վրա է ադրբեջանական զինուժը հսկողություն իրականացնում Գորիս – Կապան ավտոճանապարհի վրա»,- այս մասին լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Թագուհի Թովմասյանը՝ անդրադառնալով դիտարկմանը, որ Գորիս – Կապան ճանապարհահատվածը անվտանգ չէ, օրերս ականատես եղանք, որ երկու քաղաքացի հայտնվել էր ադրբեջանական վերահսկողության տակ, ինչպես ԱԱԾ-ն հաղորդեց՝ մոլորվել և շեղվել էին ճանապարհից և բանակցություններից հետո միայն վերադարձվեցին:
«Անհասկանալի է, թե ինչու են իշխանության ներկայացուցիչները վկայակոչում այն քարտեզները, որոնց հիման վրա այդ տարածքները ադրբեջանական են և ինչու չեն վկայակոչվում և կիրառության մեջ դրվում այն քարտեզները, որոնց հիման վրա դրանք մեր տարածքներն են: Ես չեմ հասկանում, թե ինչու է ՀՀ իշխանությունը սպասարկում ադրբեջանական շահը և անընդհատ արդարացնում Ադրբեջանի գործողությունները»,- նշեց Թովմասյանը:
Պատգամավորը հավելեց, որ երբ Գորիս – Կապան ճանապարհը փակվել է, որպես ԱԺ Մարդու իրավունքների հանձնաժողովի նախագահ, նամակներ է ուղարկել մարդու իրավունքներով զբաղվող մի շարք կառույցների և աջակցություն խնդրել. «Սակայն ՀՀ վարչապետը և իշխանական ներկայացուցիչները ամբիոնից հայտարարում են, որ այդ տարածքն ադրբեջանական է: Հետևաբար մեր նամակներն ու դիմումները դառնում են անիմաստ և առոչինչ: Սա խիստ մտահոգիչ իրավիճակ է: Այս ճակատագրական սխալները մենք չենք կարող շտկել նույնիսկ տարիներ հետո»:
Թովմասյանի դիտարկմամբ՝ ԱԱԾ-ի հայտարարությունը, թե ՀՀ քաղաքացիները մոլորվել էին, անհեթեթ է. «Քեզ պետք է կանգնեցնեն, առևանգեն: Ծաղրել մի ողջ հանրության և ասել մոլորվել են, սա ամենալավ լուծումը չէր: ԱԱԾ-ն պարտավոր է մեր անվտանգությունն ապահովել, այլ ոչ թե ադրբեջանական զինուժի գործողություններն արդարացնել»:
Մանրամասները՝ տեսանյութում:
