Քաղաքականություն
21.09.2021 | 17:12
Վիեննայում մի քանի շաբաթվա ընթացքում կվերսկսվեն միջուկային գործարքի լիարժեք վերականգնմանն ուղղված բանակցությունները: Այս մասին երեքշաբթի հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն:
«Վիեննայում բանակցությունները կվերսկսվեն շուտով՝ մի քանի շաբաթվա ընթացքում: Այս տեղեկությունը հաղորդվել է 4+1 ձևաչափի երկրներին (Ռուսաստան, Չինաստան, Ֆրանսիա, Մեծ Բրիտանիա և Գերմանիա)»,- մեջբերում է IRNA գործակալությունը:
Դիվանագետը, միաժամանակ, հավելել է, որ «մինչ այդ կառավարության քաղաքական թիմը պետք է վերջնական եզրակացություններ անի այդ բանակցությունների վերաբերյալ»։
Խաթիբզադեի խոսքով՝ «միջուկային գործարքը և Վիեննայում ընթացող բանակցությունները կլինեն Իրանի արտաքին գործերի նախարար Հոսեյն Ամիր Աբդոլլահիանի՝ ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելի հետ երկկողմ հանդիպումներում և ՄԱԿ-ի Գլխավոր վեհաժողովին ներկա 4+1 ձևաչափի երկրների ԱԳ նախարարների հետ հանդիպումների հիմնական թեմաները։
Տաթև Ֆռանգյան
