23.08.2026 | 22:08
2 քննիչներին ծեծի ենթարկած ոստիկանը և ևս 1 մեղադրյալ կալանավորվել են․ ՔԿ
Բաքվում ավարտվել են Ադրբեջանի, Թուրքիայի և Պակիստանի հատուկ նշանակության ուժերի «Երեք եղբայր 2021» զորավարժությունները․ ԼՈՒՍԱՆԿԱՐՆԵՐ
Քաղաքականություն
21.09.2021 | 15:17
Բաքվում տեղի է ունեցել Ադրբեջանի, Թուրքիայի և Պակիստանի հատուկ նշանակության ուժերի մասնակցությամբ անցկացված «Երեք եղբայր 2021» միջազգային զորավարժությունների փակման հանդիսավոր արարողությունը։ Այս մասին հայտնում են ադրբեջանական լրատվամիջոցները՝ հղում կատարելով երկրի ՊՆ-ին։
Նշվում է, որ Ադրբեջանի հատուկ նշանակության ուժերի հրամանատար, գեներալ-լեյտենանտ Հիքմեթ Միրզոևը շնորհավորել է զինծառայողներին՝ նշելով, որ զորավարժությունների մասնակիցները բարձր վարպետություն են ցուցաբերել։
«Համոզված եմ, որ զորավարժությունների ընթացքում դուք հնարավորություն ստացաք ոչ միայն բարելավել ձեր հմտությունները, այլև փոխանակվել գաղափարներով ու փորձով՝ բավական օգտակար պրոֆեսիոնալ գործունեության համար։ Համատեղ զորավարժությունները հանդիսանում են մեր ժողովուրդների ընկերության, մեր երկրների միջև սերտ համագործակցության օրինակ»,- ասել է Միրզոևը։
Թուրքիայի ԶՈՒ հատուկ նշանակության ուժերի հրամանատար Օմեր Էրբաքանն էլ հայտարարել է, որ երեք երկրների հատուկ ուժերի համագործակցությունը, կրթական ոլորտում միջոցառումները շարունակվելու են։
Պակիստանի ԶՈՒ անվտանգության և ահաբեկչության դեմ պայքարի վարչության ղեկավար գեներալ-մայոր Մումթազ Հուսեյնն իր հերթին ասել է, որ զորավարժությունների նպատակին հասել են, դրանք նպաստել են բոլոր մասնակիցների պրոֆեսիոնալիզմի մակարդակի բարձրացմանը։
Հավելենք, որ նախօրեին էլ Նախիջևանում մեկնարկել են թուրք-ադրբեջանական «Անխախտ եղբայրություն 2021» զորավարժությունները։
Էմմա Չոբանյան
