19.05.2026 | 17:52
Խուզարկությունների արդյունքում հայտնաբերվել է զենք ու թմրանյութ
Դեսպան Վարուժան Ներսեսյանը բրիտանական խորհրդարանում ՄԹ-ՀՀ բարեկամական խմբի ղեկավարին է ներկայացրել տարածաշրջանում վերջին զարգացումները
Քաղաքականություն
21.09.2021 | 14:05
Սեպտեմբերի 20-ին Միացյալ Թագավորությունում ՀՀ դեսպան Վարուժան Ներսեսյանը հանդիպում է ունեցել բրիտանական խորհրդարանում ՄԹ-ՀՀ բարեկամական խմբի ղեկավար, Պահպանողական կուսակցության անդամ Թիմ Լոութոնի հետ. տեղեկացնում են ՄԹ-ում ՀՀ դեսպանությունից:
Հանդիպման ընթացքում Թիմ Լոութոնը շնորհավորել է դեսպանին նշանակման կապակցությամբ՝ ընդգծելով հայ-բրիտանական օրակարգի մի շարք հարցերի շուրջ նոր դեսպանի հետ սերտորեն աշխատելու պատրաստակամությունը և վստահություն հայտնել, որ դեսպանի նշանակումը նոր լիցք կհաղորդի երկկողմ հարաբերություններին:
Նա նշել է, որ 2020թ․ հուլիսին ՄԹ խորհրդարանում ձևավորված խումբը բավականին ակտիվ աշխատանք է տարել հատկապես նախորդ տարվա հուլիսյան իրադարձությունների, ինչպես նաև Արցախյան պատերազմի և հետպատերազմյան ժամանակաշրջանում:
Վարուժան Ներսեսյանը երախտագիտություն է հայտնել Թիմ Լոութոնին` իր ղեկավարած խմբի կատարած լայնածավալ աշխատանքի համար` նշելով, որ պատերազմի ժամանակ մեր երկրի բարեկամների աջակցությունը շատ կարևոր էր Հայաստանի համար։ Դեսպանը ներկայացրել է նաև տարածաշրջանում վերջին զարգացումները, մասնավորապես՝ Արցախում և հայ-ադրբեջանական սահմանին, Հայոց ցեղասպանության միջազգային ճանաչման գործընթացի հեռանկարները:
Դեսպան Ներսեսյանը հույս է հայտնել, որ մոտ ապագայում հնարավոր կլինի ամրապնդել երկու պետությունների խորհրդարանների համագործակցությունը՝ հատկապես Հայաստանի Ազգային ժողովում հայ-բրիտանական բարեկամության խմբի ձևավորումից հետո:
Խոսելով Գլազգոյում կայանալիք COP-26 գագաթնաժողովի մասին `դեսպանն ընդգծել է այն կարևորությունը, որը Հայաստանը տալիս է կլիմայի փոփոխության դեմ պայքարին և որ ակնկալում է Հայաստանի կառուցողական ներդրումը գագաթնաժողովի դրական արդյունքների համար:
Զրուցակիցները համաձայնել են, որ Հայաստանն ու Միացյալ Թագավորությունը կլիմայի փոփոխության ոլորտում իրենց համագործակցությունն ընդլայնելու մեծ ներուժ ունեն:
Օգտվելով առիթից՝ Թիմ Լոութոնը շնորհավորել է դեսպանին Հայաստանի Անկախության 30-ամյակի կապակցությամբ՝ մաղթելով առաջընթաց, զարգացում և խաղաղություն:
